Një tjetër lojtar nga City te Arsenal?

E ardhmja e Julian Alvarez te Manchester City është më në pikëpyetje se kurrë më parë.

Argjentinasi kërkon më shumë minuta në këmbë, e mbi të gjitha kërkon të luajë si titullar në ndeshjet e rëndësishme të The Citizens.

Një kërkesë e cila nuk aprovohet nga trajneri Pep Guardiola, me lojtarin dhe trajnerin spanjollë që kanë bërë polemikë në distancë nëpërmjet intervistave të fundit.

Nga kjo kërkon të përfitojë Arsenali, me trajnerin Mikel Arteta që është i gatshëm t’i dhurojë Alvarez një rol protagonisti te skuadra e tij.

Operacioni për të transferuar Alvarez në Emirates nuk është aspak i lehtë pasi sulmuesi kushton 80 milionë paund.

Arsenalit do t’i duhet të largojë disa lojtarë që të financojë transferimin e 24-vjeçarit.

Megjithatë, në të kaluarën, londinezët kanë treguar se mund të transferojnë lojtarë nga City si në rastin e Zinchenkos apo Gabriel Jesus.

Gjithsesi, iu duhet të shpejtojnë për Alvarez pasi argjentinasi ka ndjekës kudo dhe Atletico Madrid është një nga klubet më të interesuara për shërbimet e tij.