Një pezullim dyvjeçar e la jashtë lojtarit të Atletico Madridit në ndeshjen ndaj Liverpoolit

Një fitore 2-1 e Liverpoolit ndaj Atletico Madridit në “Anfield” shënoi hapjen e fushatës së tyre në Ligën e Kampionëve, por skuadra madrilene udhëtoi drejt Anglisë pa një lojtar për një arsye vërtet të çuditshme.

Trajneri Diego Simeone nuk mund të llogariste te mbrojtësi i majtë Arnau Ortiz për sfidën ndaj “Reds”, edhe pse lojtari ishte plotësisht i aftë fizikisht dhe kishte kontribuar në tri prej katër ndeshjeve të kampionatit spanjoll këtë edicion.

Pengesa që e mbajti jashtë fushës ishte një dënim i vjetër, që e kishte zanafillën në vitin 2024.

Ngjarja datonte në gusht të atij viti, kur Ortiz mbante veshur fanellën e klubit polak Slask Wroclaw në Ligën e Konferencës. Gjatë një përballjeje kundër ekipit zviceran St. Gallen, ai ndëshkohet me dy kartonë të verdhë dhe për pasojë përjashtohet me të kuq, duke sjellë automatikisht pezullimin për takimin e radhës europian.

Fati luajti një lojë mizore: Slask Wroclaw humbi atë ndeshje dhe u eliminua nga kompeticioni, duke ia mohuar Ortizit çdo shans për të shlyer pezullimin në ndonjë sfidë të mëvonshme kontinentale. Si rrjedhojë, dënimi mbeti pezull për më shumë se dy vjet.

Pasi u largua nga Polonia, Ortiz firmosi me ekipin rezervë të Atletico Madridit në shtator të vitit 2025 dhe më vonë u ngjit në skuadrën e parë për sezonin 2026/27. Ndonëse ishte bërë pjesë e rëndësishme e formacionit të Simeones në startin e këtij edicioni, pezullimi i tij i akumuluar në të kaluarën u vu në fuqi detyrimisht pikërisht në ndeshjen e Ligës së Kampionëve në “Anfield”.

Në fushë, Julian Alvarez ishte një nga yjet që u paraqitën për madrilenët, por Ortiz e ndoqi takimin nga tribuna si pasojë e një kartoni të kuq të marrë dy vjet më parë, teksa Liverpooli siguroi triumfin 2-1.