Nga Manaj te Seferi e Asani, sulmuesit kuqezi shpërthejnë me gola në startin e sezonit

Shqipëria do të zhvillojë në fund të shtatorit, më 26 dhe 29 të këtij muaji, dy përballjet e radhës në Ligën e Kombeve, ndaj Bjellorusisë dhe San Marinos.

Para këtyre sfidave, disa prej sulmuesve të Kombëtares po kalojnë një formë të shkëlqyer. Rey Manaj ka shënuar 5 gola në po 5 ndeshje të luajtura me Sivassporin në kampionat, një statistikë mbresëlënëse për nisjen e sezonit.

Edhe Taulant Seferi po paraqitet në nivele të larta me Kayserisporin, ku ka realizuar 4 gola në 4 paraqitje në Ligën e Parë të Turqisë. Në formë të mirë ndodhet gjithashtu Jasir Asani, autor i 2 golave, ndërsa Milrind Daku ka kontribuar me 1 gol dhe 2 asistime.

Ernest Muçi, pavarësisht konkurrencës së madhe në një skuadër të mbushur me yje si Trabzonspori, ka lënë gjurmën e tij me 2 asistime. Vendimin përfundimtar se cilët prej tyre do të jenë pjesë e listës për ndeshjet e shtatorit do ta marrë trajneri i Shqipërisë, Rolando Maran.