Në vitin 2009 një futbollist kishte humbur këmbën nga rrufeja, kjo ishte arsyeja që danezët kërkuan shtyrjen e ndeshjes

Ndeshja mes Gjermanisë dhe Danimarkës në kuadër të fazës së 1/8 së finales ishte suspenduar përkohësisht për shkak të goditjeve të rrufesë mbi qiellin e stadiumit “Signal Iduna Park”.

Lojtarët e Danimarkës dukeshin të etur që ndeshja të ndalonte, sapo qielli u ndriçua si pasojë e goditjeve nga rrufeja.

Nuk vonoi shumë dhe gjyqtari Michael Oliver e suspendoi ndeshjen, me lojtarët që morën rrugë drejt dhomave të zhveshjes, por ndeshja filloi sërish pas 15 minutave.

Gazetari Klaus Egeland ka shpjeguar përse lojtarët danezë reaguan në atë mënyrë ndaj rrufesë sa që dëshironin që ndeshja të ndalonte.

Ai shpjegoi në rrjetet sociale se shumë lojtarë të Danimarkës e dinë rastin e Jonathan Richter, i cili ishte goditur nga rrufeja në vitin 2009.

Ai shtoi se trajneri i Danimarkës, Kasper Hjulmand në atë kohë ishte në krye të Nordsjaellandit kur Richter humbi një pjesë të këmbës së tij.

Siç ishte raportuar në vitin 2009, familja e Richter kishte konfirmuar se lojtari ka humbur këmbën e tij, gjashtë javë pasi u godit nga rrufeja në fushë.

Ky incident i tmerrshëm kishte ndodhur më 20 korrik kur Nordsjaelland po luante ndaj Hvidovres. Richter kishte mbetur në koma për 10 ditë.

Numri i tij i fanellës ishte pensionuar nga klubi ndërsa lojtari ishte detyruar të pensionohej në moshën 24-vjeçare.

Tani si 39-vjeçar, ai punon në bordin e klubit danez FC Graesrodderne, të cilët bëjnë gara në kategorinë e katërt të futbollit danez.

Zhurma që u krijua mbrëmë gjatë ndeshjes mund të dëgjohej edhe në prapaskenë pas vetëm 35 minutave lojë gjë e cila detyrua gjyqtarin të ndalojë menjëherë ndeshjen.

Pasi të gjitha palët pritën që moti të qetësohej paksa, Oliver i urdhëroi të dy ekipet kombëtare që të kthehen sërish në fushë për të vazhduar ndeshja aty ku mbeti, me Gjermaninë që në fund doli fituese me rezultat 2-0. /Telegrafi/