Në Angli të çmendur pas brazilianit të Realit, por kërkesat e madrilenëve kapin “tavanin”

Real Madridi po kalon një transformim të thellë pas një sezoni pa trofe. Me mbërritjen e Xabi Alonsos për të zëvendësuar Carlo Ancelottin, tani trajner i Brazilit, klubi ka zyrtarizuar edhe transferimet e Trent Alexander-Arnold dhe Dean Huijsen. Por ka edhe zëra për largime të mundshme, veçanërisht ai i Rodrygos.

Talenti brazilian, i cili mbërriti në Madrid në vitin 2019, ka tërhequr vëmendjen e disa klubeve të Premier Ligës, përfshirë Arsenalin, Chelsean dhe Manchester Cityn.

Ndërsa shtypi spanjoll po raporton një takim të afërt midis Rodrygos dhe Alonsos për të diskutuar të ardhmen e tij, “The Athletic” në Angli shkruan se lojtari mund të jetë një përparësi për Mikel Artetën, trajnerin e “Topçinjve ”.

Pavarësisht një sezoni zhgënjyes me 14 gola dhe 10 asiste në 51 ndeshje, Rodrygo vazhdon të vlerësohet shumë, me një çmim tregu prej 90 milionë eurosh.

Me Vinicius dhe Kylian Mbappe që udhëheqin sulmin për Realin, e ardhmja e Rodrygos mund të jetë larg Spanjës.

Edhe pse ai do të marrë pjesë në Kupën e Botës për Klube, tregu i transferimeve të verës mund t’i sjellë surpriza.