Ndryshime në listën e Kombëtares, Silvinjo zbulon zgjedhjet. Zyrtarizohet axhenda para sfidës me Serbinë

FSHF ka zyrtarizuar axhendën për Kombëtaren para sfidës me Serbinë. Kështu nesër në orën orën 11:00 do të mbahet konferenca për shtyp e trajnerit Silvinjo në ambientet e “Shtëpisë së Futbollit”, ndërsa do të zbulohet lista e lojtarëve të ftuar.

Lista e Kombëtares do të ketë ndryshime të detyruara, për shkak se mund të përmendim rastin e Marash Kumbullës që është i dëmtuar. Grumbullimi do të nisë ndërkohë zyrtarisht të hënën.

Njoftimi i FSHF-së:

“Kombëtarja shqiptare do të rikthehet në aksion për ndeshjen e radhës kualifikuese të Kupës së Botës 2026 ndaj Serbisë dhe për sfidën miqësore ndaj Jordanisë.

Grumbullimi zyrtar do të nisë ditën e hënë, më 6 tetor, ndërsa shpallja e listës së lojtarëve të grumbulluar nga trajneri Sylvinho është programuar këtë të premte, më 3 tetor. Në të njëjtën ditë, në orën 11:00, do të mbahet edhe konferenca për shtyp e trajnerit në ambientet e “Shtëpisë së Futbollit”.

Seanca e parë stërvitore e Kombëtares do të zhvillohet më 6 tetor.

Ndeshja Serbi – Shqipëri do të luhet më 11 tetor, në stadiumin “Gradski stadion Dubočica” në Leskovac, në orën 20:45.

Ndërsa miqësorja Shqipëri – Jordani do të zhvillohet më 14 tetor, në stadiumin “Air Albania”, në orën 19:00.

Ashtu siç është bërë e ditur, sipas marrëveshjes së arritur para nisjes së edicionit kualifikues, nuk do të ketë tifozë shqiptarë në Leskovac, ashtu siç nuk kishte tifozë serbë në Tiranë”.