Ndeshja e sezonit me Atalantën, Pioli: Një finale, kemi punuar shumë në aspektin psikologjik

Trajneri Stefano Pioli doli në konferencën e zakonshme për shtyp, ku u shpreh se beson te arritja e një vendi në zonën Champions dhe pranoi se i është dashur të punojë shumë në aspektin psikologjik të skuadrës.

“Kemi kaq kohë që vlerësojmë rëndësinë e ndeshjes së radhës, por kjo ndaj Atalantës është finalja e vërtetë. Kemi bërë një sezon perfekt dhe jemi gati për sforcon e fundit, që besoj se do të shpërblejë mundin dhe djersën tonë. Ka qenë një javë e vështirë për t’u menaxhuar, pasi deri të mërkurën vuajtëm zhgënjimin e barazimit me Cagliarin, ndaj na është dashur të punojmë shumë në aspektin psikologjik”, u shpreh Pioli.

Kampionati për Atalantën ka përfunduar, megjithatë trajneri i Milanit pranon se nuk pret dhurata, teksa zbuloi se Rebiç është në dyshim për sfidën e nesërme, për shkak të një problemi fizik.

“Pres të shoh Atalantën e zakonshme, që luan me intensitet të lartë dhe kërkon të fitojë. Kanë një lojë të kolauduar dhe ne u jemi afruar shumë këtë sezon, por fusha do të tregojë më shumë. Të gjithë janë në formë të mirë, me përjashtim të Rebiç, që me shumë gjasa nuk do t’ia dalë, megjithatë në Bergamo do të udhëtojmë të gjithë, edhe Ibra”, tha trajneri i kuqezinjve.