Mourinhos i dhurohet një spërkatës para Real Madrid–Inter, kujtimi që e çon 16 vite pas

Jose Mourinho u përball me një surprizë të veçantë përpara sfidës mes Real Madridit dhe Interit në Ligën e Kampionëve. Gazetari italian Tancredi Palmeri i dhuroi trajnerit portugez një spërkatës kopshti, duke i sjellë në kujtesë një prej momenteve më të spikatura të karrierës së tij.

Të martën, Mourinho do të drejtojë ndeshjen e tij të parë të sezonit në Ligën e Kampionëve, ndërsa Real Madridi do të presë Interin në “Santiago Bernabéu”. Për trajnerin portugez, përballja ka një domethënie të veçantë për shkak të dy viteve që kaloi në stolin e skuadrës italiane, veçanërisht triumfit të vitit 2010 kundër Barcelonës.

Interi e mposhti Barcelonën në gjysmëfinale me rezultat të përgjithshëm 3-2 dhe u rikthye në finalen e Ligës së Kampionëve për herë të parë që nga viti 1972. Pas ndeshjes së dytë në “Camp Nou”, futbollistët zikaltër nisën festën në fushë, por spërkatësit e ujit u aktivizuan në stadium për t’i larguar nga aty.

Festimi i Mourinhos mes ujit mbeti një nga pamjet më të paharrueshme të historisë së kohëve moderne të Championsit.

Palmeri kishte menduar pikërisht për atë episod kur përgatiti dhuratën për trajnerin. Teksa Mourinho po largohej nga konferenca për shtyp, gazetari iu afrua dhe i dha spërkatësin e kopshtit, duke rikthyer në vëmendje natën e famshme në Barcelonë.

“Misioni është shumë i vështirë, pothuajse i pamundur, t’i japësh një dhuratë Mourinhos. Është e vështirë, por do të provojmë”, kishte deklaruar gazetari përpara konferencës.

Mourinho e pranoi me humor dhuratën, mori spërkatësin dhe shtrëngoi duart me Palmerin para se të largohej. Gjesti i thjeshtë rikujtoi një prej periudhave më të suksesshme të karrierës së tij.

Fitorja ndaj Barcelonës në vitin 2010 ishte rezultat i një plani të ndërtuar me kujdes nga Mourinho. Strategjia e tij synonte të kufizonte lojën e skuadrës së Pep Guardiolës dhe, në mënyrë të veçantë, të neutralizonte Lionel Messin.

Interi fitoi 3-1 ndeshjen e parë në “San Siro”. Barcelona shënoi e para me Pedro Rodriguez, ndërsa për ekipin italian realizuan Wesley Sneijder, Maicon dhe Diego Milito.

Në takimin e kthimit, skuadra e Mourinhos u mbrojt në mënyrë të jashtëzakonshme. Edhe pse luajti me 10 futbollistë për pjesën më të madhe të ndeshjes, Interi pësoi vetëm një gol dhe siguroi kualifikimin në finale.

Pas disa vitesh, Mourinho tregoi se plani i tij ishte përqendruar kryesisht te një qëllim: Messi nuk duhej të kishte hapësirë për të luajtur lirshëm.

“Në Itali përdornin fjalën ‘Gabbia’. Mendoj se përkthimi i vërtetë është si një burg për Messin. Në fund nuk luajtëm njeri me njeri, por Zanetti, Motta, Cambiasso – të gjithë ishin përgjegjës për çdo hapësirë ku mund të shkonte Messi”, kishte shpjeguar Mourinho.

Interi mposhti më pas Bayern Munichun në finale dhe fitoi Ligën e Kampionëve. Ky sukses i dha mundësinë klubit të kompletonte një sezon historik me tripletën.