Mourinho synon të transformojë Arda Gulerin në pasardhësin e Mesut Ozilit te Real Madridi

Jose Mourinho ka një plan të qartë për Arda Gulerin, duke dashur ta kthejë talentin turk në boshtin e lojës së Real Madridit, në një rol që të kujton shumë atë që luante Mesut Ozil në periudhën e parë të trajnerit portugez në kryeqytetin spanjoll, sipas Mundo Deportivo.

Mediumi katalanas thekson se paralelet mes Gulerit dhe Ozilit kanë qarkulluar që kur mesfushori i ri u transferua nga Fenerbahce në “Santiago Bernabeu” gjatë verës së vitit 2023. Të dy lojtarët jo vetëm që ndajnë të njëjtat rrënjë, por shquhen gjithashtu për inteligjencën taktike, asistet precize dhe talentin në krijimin e mundësive për gol.

Mendohet se Mourinho e identifikon 21-vjeçarin si kandidatin perfekt për të trashëguar funksionin që më parë i takonte Ozilit, me qëllim final që ai të drejtojë manovrat ofensive të skuadrës madrilene.

Në raport theksohet se strategu lusitan do të mbështetet edhe te lidhja që Guleri tashmë ka ndërtuar me Kylian Mbappen, yllin kryesor të repartit sulmues. Objektivi është që lojtari turk ta ushqejë francezin me topa fatalë, duke rikrijuar dinamikën që Ozil kishte dikur me Cristiano Ronaldon.

Edhe pse Guler është aktivizuar në role të ndryshme që nga ardhja e tij, Mourinho është i vendosur t’i besojë një detyrë fikse dhe stabilitet në formacionin titullar.

Një tjetër element që punon në avantazh të talentit turk është eliminimi i parakohshëm i kombëtares së tij nga Kupa e Botës, çka do t’i lejojë t’i bashkohet më herët ekipit për përgatitjet parasezonale. Ky fakt i siguron Mourinhos më tepër hapësirë për ta stërvitur dhe integruar në skemat e tij.

Brenda klubit madrilen qarkullon mendimi se faza përgatitore që po afron do të jetë testi kryesor për të kuptuar potencialin e Gulerit për t’u shndërruar në një version të ri të “Mesut Ozil 2.0” nën drejtimin e Jose Mourinhos.