Mourinho përcakton largimin e parë te Real Madridi, shitja e Camavingas mundëson transferimin e Rodrit

Transferimi i Rodrit në “Santiago Bernabeu” mund të realizohet vetëm nëse Real Madridi shet fillimisht Eduardo Camavingan gjatë afatit kalimtar veror. Mesfushori 30-vjeçar i Manchester Cityt është kërkesa më e fundit e Jose Mourinhos.

Drejtuesit madrilenë synojnë të krijojnë fondet e nevojshme për afrimin e reprezentuesit spanjoll, marrëveshja e të cilit me Manchester Cityn përfundon në qershor të vitit 2027.

Rodri u shpall lojtari më i mirë i Kupës së Botës 2026, pasi udhëhoqi Spanjën drejt triumfit.

Raportimet bëjnë të ditur se strategjia financiare e Real Madridit përfshin shitjen e Eduardo Camavingas, në mënyrë që klubi të balancojë financat përpara paraqitjes së një oferte zyrtare për Rodrin.

Për mesfushorin francez 23-vjeçar, klubi madrilen ka përcaktuar një çmim prej 60 milionë eurosh. Të ardhurat nga ky operacion pritet të shërbejnë më pas për financimin e transferimit të Rodrit.

Camavinga e ka bërë të ditur privatisht se dëshiron të vazhdojë te Real Madridi, por për të ka shfaqur interes konkret Manchester City, që do ta shihte me sy të mirë mundësinë e një shkëmbimi.

Manchester United dhe Paris Saint-Germain po e ndjekin gjithashtu situatën e francezit. Krahas kampionëve të Anglisë, të dy klubet janë të gatshme të përmbushin pretendimet financiare të drejtuesve të Real Madridit.

Mourinho është personi që ka kërkuar drejtpërdrejt afrimin e Rodrit, ndërsa drejtuesit e klubit e mbështesin trajnerin portugez në projektin për rindërtimin e mesfushës.

Plani i Mourinhos është që Rodri të marrë një rol qendror në këtë repart përkrah Bernardo Silvës. Ky i fundit iu bashkua Real Madridit gjatë kësaj vere si lojtar i lirë, pasi i përfundoi kontrata me Manchester Cityn.