Mourinho impresionohet nga Wesley pas përballjes me Romën: Një lojtar vërtet i shkëlqyer

Jose Mourinho vlerësoi paraqitjen e Wesleyt në fitoren spektakolare të Real Madridit ndaj Romës, me rezultatin 4-3, duke pranuar se mbrojtësi brazilian e kishte befasuar pozitivisht.

Në një prononcim për TNT Sports, trajneri i Real Madridit foli me superlativa për mbrojtësin e krahut të Romës, pasi skuadra madrilene përmbysi disavantazhin 3-1 dhe triumfoi 4-3 falë tri golave të shënuar në minutat e fundit në “Stadio Olimpico”.

Kjo ishte përballja e parë e Mourinhos me Romën që prej shkarkimit të tij në janar të vitit 2024.

“Ai ia vështirësoi shumë punën Viniciusit në sulm dhe na krijoi vështirësi edhe në aspektin defensiv”, u shpreh Mourinho.

Vinicius kishte marrë vesh vetëm disa orë para ndeshjes se ishte dënuar me katër ndeshje moslojë në La Liga. Ai u largua nga fusha në minutën e 59-të, pak pas një pasimi të pasaktë me thembër, që i mundësoi Donyell Malenit të shënonte golin e dytë të Romës.

“E konsideroja tashmë një lojtar të mirë, por ishte hera e parë që e shihja në atë rol dhe më bëri përshtypje edhe më shumë nga sa prisja. Wesley mbrohet në mënyrë shumë të mirë dhe më pas avancon me shpejtësi të madhe. Ai është vërtet një lojtar i shkëlqyer”, deklaroi trajneri portugez.

Wesley, nga ana e tij, tha se ndihej i kënaqur nga vlerësimi i një trajneri me përvojën dhe reputacionin e Mourinhos.

“Jam shumë i lumtur. Është kënaqësi të marrësh komplimente nga një trajner si Mourinho”, deklaroi ai për të njëjtin medium.

“Vetëm lutesha dhe i përsërisja vetes: ‘Duhet ta ndal Viniciusin, duhet ta ndal Viniciusin’. Isha i përgatitur dhe jam i kënaqur me mënyrën si luajta. Kam ende shumë gjëra për të përmirësuar, por jam i kënaqur me paraqitjen time individuale”, përfundoi braziliani.