Michel Salgado nis një aventurë të re në Brazil, do të drejtojë klubin nga kategoria e katërt

Michel Salgado ka zbuluar faktorët që e shtynë të pranonte detyrën e trajnerit të North EC në Brazil, klub të cilin do ta drejtojë gjatë sezonit 2027.

Ish-mbrojtësi i Real Madridit dhe fituesi i dyfishtë i Ligës së Kampionëve u prezantua zyrtarisht në krye të skuadrës braziliane. Drejtuesit e klubit e bindën përmes këmbënguljes së tyre, planeve afatgjata dhe kushteve të ofruara në qendrën stërvitore.

Trajneri 50-vjeçar do të udhëheqë ekipin nga Montes Claros në elitën e kampionatit shtetëror Mineiro, ndërsa më pas North EC do të bëjë debutimin historik në Serie D, niveli i katërt i futbollit brazilian.

Në një intervistë për ESPN Brazil, Salgado tregoi se roli i presidentit të klubit ishte thelbësor në vendimin e tij.

“Presidenti bëri shumë përpjekje që në fillim për të më bindur. Ai më ftoi të vizitoja ambientet në Montes Claros”, tha Salgado.

Ai vlerësoi gjithashtu energjinë dhe ambicien e lojtarëve të skuadrës së re, duke nënvizuar dëshirën e tyre për të ndërtuar diçka të rëndësishme.

“Është një ekip i ri, me shumë dëshirë për të arritur objektiva. E mendova gjatë këtë vendim, por dua ta përjetoj një kompeticion kaq të madh si Kampionati Mineiro, në një vend dhe kontinent ku futbolli është pjesë e jetës”, u shpreh ai.

Salgado bëri të ditur se marrëveshja fillestare përfshin pjesëmarrjen e North EC në divizionin e parë të Kampionatit Mineiro. Ai theksoi se klubi do ta përballojë këtë përvojë me përulësi dhe vullnet të madh për punë.