Messi shkëlqen me Argjentinën, pesë spanjollë në ekipin e gjysmëfinaleve të Botërorit

Spanja dhe Argjentina prenë biletat për finalen e Kupës së Botës falë paraqitjeve bindëse në gjysmëfinale, çka është pasqyruar edhe në formacionin e javës të publikuar nga Sofascore.

Suksesi 2-0 i Spanjës përballë Francës, si edhe fitorja dramatike 2-1 e Argjentinës ndaj Anglisë, prodhuan performanca të spikatura individuale. Në përzgjedhje kanë zënë vend si futbollistë të njohur që konfirmuan cilësinë e tyre, ashtu edhe disa emra surprizë.

Në sulm, Lionel Messi ishte një prej protagonistëve kryesorë. Kapiteni argjentinas nuk gjeti rrugën e rrjetës kundër Anglisë, por ndikimi i tij ishte vendimtar përmes dy asistimeve, rasteve të mëdha që krijoi dhe udhëheqjes së skuadrës drejt finales së Kupës së Botës.

Krah tij është Lautaro Martinez, i cili bëri diferencën menjëherë pas futjes në fushë nga stoli. Sulmuesit argjentinas i mjaftuan vetëm disa minuta për të realizuar golin vendimtar, duke siguruar kualifikimin.

Mesfusha udhëhiqet nga Rodri, që konfirmoi sërish aftësinë për të kontrolluar ritmin në ndeshje të mëdha. Spanjolli fitoi duele, organizoi aksionet dhe ishte një ndër faktorët që e vështirësuan ndërtimin e lojës për Francën.

Leandro Paredes dhe Enzo Fernandez i dhanë Argjentinës ekuilibër në qendër të fushës. Paredes menaxhoi ritmin e takimit, ndërsa Enzo, përveç rolit në organizim, shënoi edhe golin e barazimit ndaj Anglisë.

Edhe pse Anglia u eliminua, Elliot Anderson arriti të spikaste në radhët e saj. Mesfushori u dallua për intensitetin në përballje dhe energjinë gjatë gjithë ndeshjes, duke merituar përfshirjen në formacionin e javës.

Spanja është skuadra më e përfaqësuar, me pesë futbollistë në këtë përzgjedhje, një tregues i kontrollit që ushtroi ndaj Francës.

Unai Simon është zgjedhur në portë, pasi e mbylli ndeshjen pa pësuar gol falë tri pritjeve dhe një performance të sigurt. Ai ndihmoi ekipin e Luis de la Fuentes të arrinte finalen.

Në të djathtë të mbrojtjes renditet Pedro Porro, një prej figurave kryesore të sfidës. Ai realizoi gol, kontribuoi në sulm dhe shfaqi një lojë të plotë, si në fazën mbrojtëse ashtu edhe në krijimin e aksioneve.

Pau Cubarsí dhe Aymeric Laporte formojnë dyshen në qendër të repartit defensiv. Të dy u karakterizuan nga siguria në ndërhyrje dhe qetësia në ndërtimin e lojës, ndërsa Marc Cucurella plotëson mbrojtjen pas një paraqitjeje solide në krahun e majtë.