Messi qëndron te Inter Miami, përjashtohet huazimi në Argjentinë

E ardhmja e afërt e Lionel Messit do të vazhdojë të jetë e lidhur me Inter Miami. Megjithëse është përfolur gjerësisht një kthim emocional në Argjentinë, ylli argjentinas nuk planifikon të shkojë atje në huazim gjatë dimrit dhe mbetet tërësisht i angazhuar në projektin e tij në MLS, pavarësisht afërsisë me klubin e fëmijërisë.

Raportimet për një kalim të përkohshëm të 39-vjeçarit në janar te Neëell’s Old Boys janë pasuar nga sqarimi i ekspertit të transferimeve, Fabrizio Romano. Sipas gazetarit italian, aktualisht nuk po zhvillohen negociata për një marrëveshje që do ta rikthente Messin në Amerikën e Jugut.

Romano e ka përjashtuar kategorikisht mundësinë e largimit të tij në huazim. Ai ka bërë të ditur gjithashtu se argjentinasi, fitues i tetë Topave të Artë, synon ta përmbushë deri në fund kontratën që ka me Inter Miami, e cila zgjat deri në dhjetor të vitit 2028.

Qëndrimi i Messit mund të shtrihet edhe përtej këtij afati. Burime pranë klubit kanë lënë të kuptohet se ai është i gatshëm të shqyrtojë një zgjatje të marrëveshjes me Inter Miamin kur të jetë koha e përshtatshme.

Në të njëjtën kohë, pasiguria që rrethon të ardhmen e Neymarit te Santos po ushqen gjithnjë e më shumë diskutimet për një ribashkim të brazilianit me Messin.

Me kontratën e 34-vjeçarit që po shkon drejt përfundimit, janë shtuar zërat se Inter Miami mund të përdorë afatet e ardhshme për përputhjen me rregullat e skuadrës, me synimin për ta sjellë sulmuesin në MLS.

Nëse realizohet, ky transferim do të bashkonte sërish në futbollin amerikan Messin, Luis Suarez dhe Neymarin, treshen legjendare të Barcelonës të njohur si “MSN”. Një marrëveshje e tillë do të renditej ndër operacionet më të mëdha që ka njohur historia e futbollit në Amerikën e Veriut.