Mediumi spanjoll nxjerr detaje nga prapaskenat: Mbappe po punon për ta çuar Michael Olise te Real Madridi

Kylian Mbappe është angazhuar për të bindur bashkëkombësin e tij francez, Michael Olise, që të transferohet te Real Madridi.

Siç raporton El Chiringuito TV, sulmuesi francez e sheh anësorin e Bayern Munichut si një përforcim të përsosur për fazën sulmuese të skuadrës madrilene dhe dëshiron ta ketë në “Santiago Bernabeu”.

Të dy lojtarët po kalojnë një moment të shkëlqyer në Kupën e Botës 2026, ku janë shfaqur si disa nga elementët më vendimtarë të Francës në këtë turne. Deri tani, Mbappe ka shënuar gjashtë gola, ndërsa Olise ka marrë rolin e organizatorit kryesor të lojës, me po aq asistime të regjistruara.

Ndonëse Real Madridi publikoi së fundmi një deklaratë ku hodhi poshtë interesimin për Olisen, duke vënë në pah respektin reciprok mes klubit spanjoll dhe Bayern Munichut, raportimet tregojnë një panoramë tjetër në prapaskenë.

Sipas këtyre raportimeve, vetë lojtari e konsideron Real Madridin si zgjedhjen e tij të parapëlqyer, edhe pse në garë për të mbetet edhe Paris Saint-Germaini.

Olise vjen pas një sezoni të jashtëzakonshëm, gjatë të cilit realizoi 22 gola dhe dhuroi 31 asistime në të gjitha garat, shifra që kanë tërhequr interesin e klubeve më të mëdha të Evropës.

Gjithsesi, realizimi i këtij transferimi gjatë kësaj vere paraqitet mjaft i ndërlikuar, pasi Real Madridi përballet me kufizime financiare dhe duhet të largojë disa lojtarë përpara se të bëjë afrime të reja.

Në të njëjtën kohë, Bayern Munichu mban një qëndrim të palëkundur, duke e cilësuar Michael Olisen si të paprekshëm dhe si një pjesë thelbësore të projektit të klubit bavarez./