Mbappe sqaron arsyen e zëvendësimit ndaj Marokut: kam vetëm një shqetësim të lehtë në kyç

Franca preu biletën për në gjysmëfinalen e Kupës së Botës 2026 pasi mposhti Marokun me rezultatin 2-0 në Boston, megjithatë vëmendjen në fund e mori gjendja e Kylian Mbappe.

Sulmuesi francez u largua nga loja 13 minuta para përfundimit, pasi ndjeu dhimbje në kyçin e këmbës së djathtë. Ai kërkoi të zëvendësohej dhe vendin e tij në fushë e mori Jean-Philippe Mateta.

Pas daljes nga ndeshja, lojtari i Real Madridit u trajtua nga stafi mjekësor në stol. Mjekët i aplikuan akull në pjesën e dëmtuar, çka shtoi shqetësimin mes tifozëve francezë për gjendjen e kapitenit të tyre.

Vetë kapiteni i Francës më pas sqaroi se problemi nuk është serioz dhe lidhet vetëm me një shqetësim të vogël në kyçin e këmbës.

“Kam një dëmtim të vogël në kyçin e këmbës, por jam plotësisht mirë. Mateta ishte në një pozitë më të mirë për të luajtur minutat e mbetura të ndeshjes dhe në atë moment ishte më i freskët fizikisht. Kjo është gjithçka që ndodhi”, deklaroi Mbappe.

Pavarësisht këtij episodi, Mbappe luajti rol vendimtar në suksesin ndaj Marokut. Edhe pse humbi një penallti në pjesën e parë, ai realizoi golin që i dha avantazhin “Gjelave”.

Me këtë rrjetë, ylli francez shkoi në tetë gola në këtë Kupë Bote, duke u barazuar me Lionel Messin.

Në total, Mbappe numëron 20 gola në të gjitha ndeshjet e tij në Botëror, vetëm një gol më pak se rekordi i argjentinasit.

Ekipi i drejtuar nga Didier Deschamps vijon garën me synimin për të fituar trofeun, pasi në Katar 2022 u rendit në vendin e dytë. Në gjysmëfinale, Franca do të ndeshet me fituesin e përballjes mes Spanjës dhe Belgjikës.