Mbappe për dominimin e PSG-së në Evropë: Synimi ynë është t’i heqim nga froni

Kylian Mbappe ka komentuar suksesin e Paris Saint-Germainit, i cili ka fituar dy herë radhazi Ligën e Kampionëve pas largimit të tij, ndërsa Real Madridi vazhdon të presë rikthimin e trofeut prestigjioz në Santiago Bernabeu.

Sulmuesi francez u largua nga PSG-ja në verën e vitit 2024 dhe firmosi me Real Madridin. Që prej atëherë, skuadra parisiene ka kaluar momentin më të suksesshëm në historinë e saj, duke triumfuar dy sezone radhazi në garën më të rëndësishme evropiane.

Gjatë intervistës së fundit për L’Equipe, Mbappe u pyet nëse këto rezultate lidhen me largimin e tij, por ai nuk pranoi ta interpretonte situatën në këtë mënyrë.

“Për mua është thjesht 2 + 2 = 4. Ata e fituan trofeun dhe këtë nuk mund t’ua mohojmë. Urime atyre”, deklaroi francezi.

Ai theksoi se PSG-ja e ka merituar suksesin dhe se përsëritja e triumfit për të dytin vit radhazi është një arritje e jashtëzakonshme.

“Ata i ndërtuan vetë fitoret e tyre. E kanë fituar për dy vite radhazi, gjë që është e jashtëzakonshme. Tani janë skuadra që të gjithë duhet ta mposhtin”, u shpreh Mbappe.

Futbollisti pranoi se Real Madridi dhe ekipet e tjera pretendente do të nisin sezonin e ri me të njëjtin synim: të ndalin kampionët në fuqi.

“Ne, Real Madridi dhe të gjitha skuadrat e tjera, do të hyjmë në garë me objektivin për ta rrëzuar ekipin që e ka fituar Ligën e Kampionëve dy herë radhazi”, tha ai.

Mbappe dhe Real Madridi renditen ndër favoritët kryesorë për t’i dhënë fund epërsisë së PSG-së në Evropë. Megjithatë, kampionët në fuqi mbeten një rival shumë i fortë për çdo skuadër që synon trofeun më prestigjioz të futbollit evropian.