Mbappé flet si një lider: Fishkëllimat për Vinicius? Nëse vijnë, duhet të jenë për të gjithë

Kylian Mbappé merr vëmendjen, por edhe përgjegjësinë. Në prag të ndeshjes së Ligës së Kampionëve kundër Monacos, klubit që e lançoi atë në ligën më të lartë evropiane, sulmuesi i Real Madridit u zgjodh për të folur në emër të ekipit në një moment kritik të sezonit.

Francezi e hapi konferencën për shtyp me një mesazh që tejkalon futbollin, duke menduar për viktimat e aksidentit hekurudhor në Cordoba: “Ka gjëra më të rëndësishme se futbolli. Mendimet e mia shkojnë për familjet që kanë humbur dikë”.

Më pas është koha për në fushë. Mbappé nuk e nënvlerëson Monacon, ndërsa pranon vështirësitë e tyre: “Ata nuk janë në momentin e tyre më të mirë, por janë ende një ekip i aftë të konkurrojë. Do të duhet të jemi agresivë dhe ta tregojmë se është një mbrëmje për ne. Në Bernabeu, në Champions, kemi një avantazh”.

Tema më e nxehtë mbetet raporti me publikun, fishkëllimat e tifozëve. Mbappé nuk fshihet: “I kuptoj. Si tifoz, përpara se të bëhesha futbollist, edhe unë fishkëllenja kur gjërat nuk shkonin mirë. Por nëse fishkëllen, duhet ta bësh me të gjithë ekipin. Nuk ka kuptim të drejtosh gishtin nga dikush. Po bëjmë keq si grup dhe duhet ta ndryshojmë këtë brenda fushës”.

Një diskutim që ndërthuret në mënyrë të pashmangshme me situatën e Vinícius Jr., i cili e ka gjetur veten në shënjestër të tifozëve. “Nuk është faji i tij, është përgjegjësi e të gjithëve. Vinícius është një qenie njerëzore, si dhe një kampion. Ai duhet të mbrohet, jo të lihet vetëm. Kur është i lumtur, është një nga më të mirët në botë”.