Marcus Rashford tregon çfarë i duhet Anglisë në Botërorin 2026: Të sakrifikojmë si te klubet

Marcus Rashford ka ndarë mendimin e tij për frymën që mbizotëron te kombëtarja e Anglisë në Kupën e Botës 2026, duke vënë theksin te bashkimi i grupit dhe gatishmëria për të dhënë gjithçka për skuadrën.

Sulmuesi anglez nënvizoi se futbollistët e “Tre Luanëve” duhet të kenë në kombëtare të njëjtin nivel angazhimi që tregojnë javë pas jave me klubet e tyre.

“Ne jemi një skuadër e vetme dhe duhet të luftojmë për njëri-tjetrin në të njëjtën mënyrë siç luftojmë për ekipet tona në nivel klubesh”.

“Kjo është norma tani”.

Ai pranoi gjithashtu se gara për të siguruar një vend në formacion është jashtëzakonisht e madhe dhe se jo çdo lojtar mund të jetë i kënaqur me minutat në dispozicion.

“E kuptojmë se është e vështirë sepse të gjithë duan të luajnë dhe shumë lojtarë e meritojnë të luajnë. Në një moment, disa lojtarë do të zhgënjehen, por gjithçka varet nga mënyra se si e menaxhon atë situatë”.

Sipas Rashford, forca kryesore e Anglisë qëndron te intensiteti, ndaj skuadra duhet të diktojë lojën dhe ritmin kundër çdo rivali.

“Mendoj se duhet të sjellim një intensitet që kundërshtarët nuk mund ta përballojnë dhe përpiqemi t’i qëndrojmë besnikë kësaj ideje. Nëse luajmë në atë nivel, kjo mund të të fitojë ndeshje”.

Ai shtoi se ekipi mund të kontrollojë vetëm sjelljen dhe qasjen gjatë 90 apo 120 minutave të takimit, ndaj fokusi duhet të mbetet pikërisht aty.

“E vetmja gjë që mund ta parashikojmë është mënyra se si sillemi gjatë 90 apo 120 minutave të ndeshjes. Prandaj duhet të fokusohemi te kjo si lojtarë. Duhet të vazhdojmë ta shtyjmë veten përpara. Ne jemi padyshim të aftë për këtë”, përfundoi Rashford.

Anglia shihet si një prej skuadrave favorite për të avancuar larg në Kupën e Botës 2026./