Maran feston debutimin fitues me Shqipërinë: Një nisje më të mirë nuk mund të kërkohej

Shqipëria e ka nisur me sukses aventurën e re në Ligën e Kombeve, duke triumfuar 2-0 ndaj Bjellorusisë në “Air Albania”, në ndeshjen e parë me Rolando Maranin në drejtimin e skuadrës kuqezi.

Rezultati u përcaktua që në fraksionin e parë të lojës. Kristjan Asllani zhbllokoi takimin nga pika e bardhë në minutën e 34-t, ndërsa Ernest Muçi shënoi golin e dytë në minutat shtesë të pjesës së parë.

Pas përfundimit të ndeshjes, përzgjedhësi italian shprehu kënaqësinë e tij për paraqitjen e lojtarëve dhe mënyrën se si ata zbatuan detyrat e dhëna.

“Nuk mund të kishte një fillim më të mbarë se ky. Jam jashtëzakonisht i lumtur me atë që djemtë dhanë në fushën e lojës. Kemi punuar shumë gjatë këtyre ditëve dhe të shohësh këtë lloj impenjimi dhe reagimi është fantastike”, ka deklaruar Maran.

Maran nënvizoi se Shqipëria e kontrolloi takimin dhe se fitorja e arritur ndaj Bjellorusisë ishte tërësisht e merituar.

“E dominuam lojën dhe fitorja është plotësisht e merituar. Ky është hapi i parë drejt asaj që duam të ndërtojmë”, u shpreh ai.

Pavarësisht startit pozitiv, trajneri kërkoi përqendrim dhe punë të mëtejshme, duke theksuar nevojën që skuadra të ruajë të njëjtin ritëm në sfidat e ardhshme.

“Duhet të qëndrojmë me këmbë në tokë dhe të vazhdojmë të përmirësohemi me të njëjtin pasion”, përfundoi ai.

Me këtë fitore, Shqipëria siguroi tri pikët e para në grup, ndërsa Rolando Maran e nisi në mënyrën më të mirë debutimin e tij në stolin kuqezi.