Manchester United pranon klauzolë të pazakontë për largimin e Altay Bayindir

Altay Bayindir do ta vijojë karrierën në Spanjë, pasi Manchester United pranoi përfshirjen e një klauzole të veçantë në marrëveshjen për largimin e portierit.

Reprezentuesi turk iu bashkua Celta Vigos në fillim të këtij muaji nëpërmjet një huazimi njëvjeçar dhe do ta kalojë sezonin 2026/27 me klubin spanjoll.

Ardhja si lojtar i lirë e portierit me përvojë Karl Darlow bëri që Bayindir të mos konsiderohej më pjesë e nevojshme e skuadrës së Unitedit. Për 28-vjeçarin, kjo periudhë huazimi mund të shënojë edhe fundin e aventurës së tij me fanellën e “Djajve të Kuq”.

Në marrëveshjen ndërmjet klubeve është vendosur edhe një opsion blerjeje me vlerë rreth 4 milionë euro. Bayindir ndodhet në vitin e fundit të kontratës me Manchester Unitedin, i cili e ka të drejtën ta zgjasë atë edhe për një sezon, por nuk duket i interesuar ta mbajë portierin pas kësaj vere.

Sezonin e kaluar, Bayindir e nisi si zgjedhja e parë në portë nën urdhrat e Ruben Amorimit, duke marrë vendin e Andre Onanas. Situata ndryshoi pas disfatës 3-1 kundër Sunderlandit në shtator, kur ai u zëvendësua në formacion nga Senne Lammens dhe më pas nuk arriti ta fitonte sërish vendin.

Prania e Lammens, Darlow dhe Tom Heaton në repartin e portierëve e shtyu Unitedin t’i hapte rrugë transferimit të turkut drejt Celta Vigos.

Një hollësi interesante nga kushtet e marrëveshjes është bërë publike nga drejtori i klubit spanjoll, Garces, sipas Faro de Vigo, përmes Sport Witness. Pagesa që Celta Vigo duhet t’i bëjë Unitedit për huazimin është përcaktuar në varësi të minutave që Bayindir do të kalojë në fushë.

Kjo nënkupton se kostoja e huazimit për Celta Vigon do të ulet sa më shumë aktivizime të regjistrojë portieri turk.

“Nëse ka një pagesë për huazimin, ajo reduktohet në varësi të numrit të ndeshjeve që ai luan. Kemi edhe opsionin e blerjes dhe, për më tepër, United mbulon një pjesë të pagës së tij”, ka deklaruar Garces.

Përmbajtja e kësaj klauzole tregon se Manchester United dëshiron që Bayindir të luajë rregullisht dhe të zhvillojë një sezon pozitiv në Spanjë, me synimin që Celta Vigo ta blejë përfundimisht. Kjo alternativë duket më e preferuar për klubin anglez sesa aktivizimi i mundësisë për t’ia zgjatur kontratën edhe me një sezon.