Maignan shtyn rikthimin te Milani, Al-Nassr interesohet për kapitenin francez

E ardhmja e Mike Maignan te Milani është vendosur sërish në qendër të vëmendjes, pasi portieri francez ka shtyrë përfundimin e pushimeve dhe bashkimin me skuadrën për fazën përgatitore, ndërkohë që Al-Nassr ka shfaqur interes për të.

“Gazzetta dello Sport” raporton se klubi saudit, pjesë e të cilit është Cristiano Ronaldo, po tregon interes konkret për reprezentuesin e Francës.

Kapiteni i Milanit duhej të paraqitej në klub më 12 gusht, por rikthimi i tij është zhvendosur për më 16 gusht. Shtyrja, së bashku me lëvizjet e Al-Nassr, ka shtuar pikëpyetjet mbi të ardhmen e tij.

Edhe gjatë verës së kaluar, 31-vjeçari ishte afër ndarjes me “Rossonerët”. Chelsea i kishte paraqitur një ofertë të rëndësishme, por drejtuesit e Milanit nuk pranuan ta lejonin të largohej.

Maignan mbërriti te Milani nga Lille në vitin 2021, për të zënë vendin e lënë bosh nga Gianluigi Donnarumma. Që nga transferimi, francezi është bërë një nga lojtarët më të rëndësishëm të ekipit dhe tashmë mban edhe shiritin e kapitenit.

Mundësia e transferimit mund të rikthehet në diskutim pas interesimit të Al-Nassr. Klubi nga Arabia Saudite po ndjek nga afër situatën e portierit, ndërsa Milani synon ta ketë ende në përbërje.

Deri tani nuk është arritur asnjë marrëveshje për kalimin e Maignan tek Al-Nassr. Megjithatë, zhvillimet do të monitorohen me kujdes në ditët e ardhshme, sidomos pasi portieri të kthehet në Milanello.