Lukaku pranë transferimit te Fenerbahçe, marrëveshja pothuajse e mbyllur

Romelu Lukaku pritet t’i japë fund aventurës së tij te Napoli dhe të vazhdojë karrierën në Turqi. Sulmuesi belg është pranë kalimit te Fenerbahçe për 7 milionë euro.

Operacioni u zhbllokua falë përfshirjes së drejtpërdrejtë të presidentit napolitan, Aurelio De Laurentiis. Bisedimet e vazhdueshme që ai zhvilloi me Ledure, agjentin e lojtarit, dhe me drejtuesit e klubit turk mundësuan arritjen e marrëveshjes së shumëpritur.

Lukaku e kishte pranuar më herët ofertën e Fenerbahçes për një kontratë njëvjeçare, ku përfshihet edhe mundësia e zgjatjes për një sezon të dytë. Përfitimet e belgut do të jenë rreth 10 milionë euro në sezon.

Edhe klubet tashmë kanë gjetur gjuhën e përbashkët, ndërsa përfundimi i transferimit varet nga rezultatet e kontrolleve mjekësore.

Shitja e “Big Rom” do t’i krijonte Napolit më shumë hapësirë për të vepruar gjatë afatit kalimtar. Sidoqoftë, përforcimi i sulmit me Gabriel Jesus nuk përbën aktualisht përparësinë kryesore të klubit italian, ndonëse braziliani dëshiron të largohet nga Arsenali dhe është i gatshëm të kalojë te Napoli.

Prioritetet e drejtuesve napolitanë kanë ndryshuar pas dëmtimeve të Marianuccit dhe Alessandro Buongiornos. Për këtë arsye, klubi po kërkon me urgjencë një futbollist të ri për repartin e mbrojtjes.

Emri i parë në listën e Napolit është Benoit Badiashile i Chelseat, ndërsa synimi është që marrëveshja për mbrojtësin të përfundojë sa më shpejt.

Lukaku, ndërkohë, mund të mos jetë futbollisti i vetëm që largohet nga stadiumi “Diego Armando Maradona”. Edhe Noa Lang është afër ndarjes me Napolin, pasi Ajax ka shprehur interes për sulmuesin holandez.

Realizimi i këtij operacioni mund të lehtësohet nga një transferim i mundshëm i Gonçalo Ramos drejt PSG-së. Napoli është i gatshëm të heqë dorë nga Lang nëse paraqitet oferta e përshtatshme, ndërsa deri tani nuk ka asnjë propozim konkret për Lorenzo Luccan.