Lukaku i paprekshëm, Interi refuzon ofertat nga Premier League

Nuk ka dyshime, Romelu Lukaku mbetet një pikë fikse edhe për Interin e ri të Simone Inzaghi. Sulmuesi belg, ende me pushime për t’u çlodhur pas një sezoni ku ka shpenzuar jashtëzakonisht shumë energji, por edhe plot kënaqësi në planin personal për fitimin e titullit të parë në Itali, si dhe diçka më pak për sa i përket Europianit me Belgjikën e tij, nuk ka ndër mend të dëgjojë sirenat e merkatos që e duan të rikthehet në Premier League.

Chelsea dhe Manchester City janë dy klubet që po kërkojnë më shumë një përforcim me peshë për repartet respektive të sulmit dhe madje kanë bërë ndonjë sondazh me stafin përfaqësues të lojtarit, por disa herë Lukaku ka përsëritur vendimin e tij për të mbajtur veshur fanellën e Interit, skuadër me të cilën është i lidhur në kontratë deri në qershor 2024.

I shpërblyer si duhet në aspektin sportiv, me ringritjen e tij te Interi ku ka shfaqur potencialin më të mirë, belgu do të jetë më i vlerësuar edhe në aspektin ekonomik, duke parë që akordi i firmosur në verën e 2019-ës, parashikon një rritje të pagës së tij deri në 8.5 milionë euro në sezon.