Luajti për kombëtaren gjermane dhe fitoi Europianin për U-21, tani pranon ftesën të luajë për Sirinë

Ish-mesfushori i Gjermanisë dhe shumë klubeve të mëdha, Mahmoud Dahoud, u emërua në skuadrën prej 24 lojtarësh të Sirisë, pasi vendosi të binte dakord për kushtet me ekipin kombëtar arab.

28-vjeçari me origjinë siriane është thirrur për të luajtur për vendin e tij në kualifikueset e Kupës së Botës kundër Myanmarit, të cilat do të luhen më 21 dhe 26 mars.

“Mahmoud Dahoud pritet të jetë i pranishëm për ndeshjen e dytë kundër Myanmarit në Dammam dhe për shkak të rrethanave të veçanta familjare ai do të humbasë ndeshjen e parë”, thuhet në një deklaratë të Federatës Siriane të Futbollit.

Dahoud përfaqësoi Gjermaninë në rininë e tij dhe fitoi Kampionatin Evropian U-21 në vitin 2017, dhe ka dy ndeshje për kombëtaren A të Gjermanisë.

Ai luajti për Borussia Monchengladbach dhe Borussia Dortmund përpara se të bashkohej me Stuttgartin nga Brightoni.

“Gjermania është shtëpia ime, kalova gjithë jetën time këtu dhe isha krenar që luaja për Gjermaninë. Siria është vendi i origjinës së familjes sime dhe vendi im i lindjes”, ka thënë fillimisht Dahoud në një intervistë për Sky Germany.

“Mësova herët nga familja ime sa të privilegjuar jemi që jetojmë në Gjermani dhe në të njëjtën kohë sa e rëndësishme është t’u sjellësh gëzim popullit të Sirisë”, përfundoi mesfushori. /Telegrafi/