Liverpooli dhe Manchester Unitedi interesohen për transferimin e Pierre Kalulus

Pierre Kalulu është bërë një prej lojtarëve më të rëndësishëm në mbrojtjen e Juventusit, ndaj klubi torinez ka nisur përpjekjet për t’i zgjatur kontratën.

Paraqitjet e mbrojtësit francez kanë tërhequr ndërkohë vëmendjen e Liverpoolit dhe Manchester Unitedit, dy prej klubeve më të mëdha të Ligës Premier.

Juventusi synon të rikthehet si pretendent për titullin në Serie A, por për ta arritur këtë objektiv duhet të përmirësojë ndjeshëm nivelin e skuadrës gjatë këtij sezoni.

Në kuadër të këtij synimi, drejtuesit bardhezi po përqendrohen edhe në forcimin e projektit të Luciano Spallettit, i cili ka marrë besimin e klubit për të vijuar punën.

Trajneri italian e çmon veçanërisht rolin që luan Pierre Kalulu (26 vjeç), ndërsa mbajtja e mbrojtësit në Torino është kthyer në një objektiv kryesor të Juventusit.

Për këtë arsye, klubi ka nisur tashmë diskutimet për të siguruar të ardhmen e tij, edhe pse marrëveshja aktuale e Kalulusit është e vlefshme deri në vitin 2029.

Sipas raportimeve të Manchester Evening News, interesimi nga Anglia nuk është shuar, pasi të dyja klubet vazhdojnë të ndjekin nga afër situatën e futbollistit.

Manchester Unitedi dhe Liverpooli pritet të rikthehen në garë për shërbimet e Kalulusit gjatë afatit kalimtar të janarit.

Megjithatë, Juventus nuk dëshiron të heqë dorë lehtësisht nga mbrojtësi dhe është i vendosur të kundërshtojë përpjekjet e klubeve angleze për ta transferuar atë.

Kalulu shihet në Torino si një element thelbësor i projektit të klubit, i cili synon ta mbajë në skuadër pavarësisht interesimit që mund të vijë nga Liga Premier.