L’Equipe raporton: Michael Olise synon kalimin te Real Madridi në verë

Michael Olise, sulmuesi i Bayern Munichut, e ka shprehur hapur synimin që gjatë kësaj vere të transferohet te Real Madridi.

Sipas mediave franceze, futbollisti 23-vjeçar u ka treguar personave pranë tij dhe shokëve të skuadrës se dëshiron të luajë për klubin spanjoll. Ai gjithashtu ka kërkuar informacion nga lojtarët e përfaqësueses franceze që kanë lidhje me ekipin nga Madridi.

Në përpjekje për ta bindur të ndryshojë qëndrim është përfshirë Dayot Upamecano, bashkëlojtar i Olises si te Bayern Munichu, ashtu edhe te Franca.

Mbrojtësi francez, i cili zhvilloi një Kupë të Botës në nivel të lartë, ka marrë përsipër një lloj “misioni” për ta mbajtur Olisen te kampioni gjerman.

Raportimet thonë se Upamecano e ka ngacmuar vazhdimisht me shaka të tipit: “Nuk mund të largohesh!”, por argumenti i tij shkon përtej humorit.

Sipas tij, Bayerni mbetet një prej klubeve më të forta të Evropës, ku Olise mund të luftojë për trofe të mëdhenj dhe të vijojë rritjen e tij në një mjedis konkurrues.

Gjithsesi, vullneti i sulmuesit për të kaluar te Real Madridi duket i fortë dhe kjo çështje nuk ka mbetur pa u vënë re në klubin bavarez.

Olise vlerësohet ndër talentet më të dalluar të futbollit evropian dhe një lëvizje e mundshme drejt “Santiago Bernabéu” do të përbënte një nga transferimet më të bujshme të këtij afati kalimtar.