Latour kundër triumfit të Mbappes në “Topin e Artë”: Do të ishte një turp i madh

Bertrand Latour ka ndezur debat në Francë me qëndrimin e tij kundër mundësisë që Kylian Mbappe të shpallet fitues i “Topit të Artë” për vitin 2026.

Gjatë emisionit “Canal Football Club” në Canal+, gazetari i njohur francez vuri në pikëpyetje një vlerësim të tillë për sulmuesin e Real Madridit. Sipas tij, mungesa e trofeve të rëndësishëm në aspektin kolektiv nuk e mbështet një fitore të tillë individuale.

Latour argumentoi se çmimi prestigjioz nuk duhet të përcaktohet vetëm nga performanca personale e një futbollisti, por edhe nga rezultatet që ai arrin me ekipin gjatë vitit.

“Ju të gjithë po prisni vetëm një gjë, që ai ta fitojë Topin e Artë në një vit kur nuk ka fituar asgjë”, deklaroi ai.

Më tej, gazetari e ashpërsoi qëndrimin e tij, duke thënë se një sukses i mundshëm i Mbappes do të dëmtonte imazhin e çmimit.

“Po jua them qartë, ai do të ishte një Top i Artë i turpshëm”, u shpreh Latour.

Ai tregoi gjithashtu se për këtë temë kishte biseduar me një mik shumë të afërt, i cili, sipas tij, do të jetë personi që do ta dorëzojë çmimin gjatë ceremonisë së këtij viti.

“Personi që do ta dorëzojë Topin e Artë është një nga miqtë e mi më të mirë, prandaj jam shumë i qetë. I thashë se nëse ia jepni atij, do të jetë Topi i Artë i turpit. Shpresoj që gazetari francez të marrë një vendim me gjykim të kthjellët”, tha ai.

Ceremonia e “Topit të Artë” për vitin 2026 do të zhvillohet të hënën, më 26 tetor.

Mbappe vazhdon të jetë një prej kandidatëve më të diskutuar për çmimin individual më të rëndësishëm të futbollit, ndërsa komentet e Latour kanë rihapur debatin mbi peshën që duhet t’u jepet paraqitjeve individuale në raport me trofetë e fituar nga skuadra.