Laporta kritikon Real Madridin: “Janë kundër gjithçkaje dhe po humbasin prestigjin

Joan Laporta, presidenti i Barcelonës, ka kritikuar Real Madridin për qëndrimin që, sipas tij, klubi madrilen mban ndaj klubeve dhe organizatave të futbollit evropian.

Laporta tha se Real Madridi po përpiqet ta zhvendosë vëmendjen nga periudha e mirë e Barcelonës. Ai vuri në pikëpyetje edhe mënyrën si rivalët e menaxhojnë marrëdhënien me institucionet sportive.

“Real Madridi flet për tema të tjera që vëmendja të largohet. Barcelona po përjeton një moment të mrekullueshëm: po kënaqemi me futbollin, po kalojmë një nga periudhat më të bukura të historisë sonë dhe po marrim vlerësim ndërkombëtar”, u shpreh ai.

Presidenti i Barcelonës shtoi se skuadra ka nëntë kampionë të botës dhe lojtarë që shërbejnë si pikë referimi në pozita të ndryshme. Sipas tij, ekipi admirohet, ndërsa Real Madridi po përpiqet t’ia zbehë këto arritje.

Duke përmendur UEFA-n dhe Euroleague në basketboll, Laporta e akuzoi Real Madridin se kundërshton nismat dhe organizatat sportive. “Ata janë kundër gjithçkaje dhe të gjithëve”, deklaroi ai.

Sipas Laportës, ky qëndrim tregon se Real Madridi po humbet prestigj, njohje dhe besim në nivel kombëtar e ndërkombëtar. Ai iu referua edhe mungesës së përfaqësuesve madrilenë në kongresin e Asociacionit të Klubeve Evropiane.

“Sillen me arrogancë, mendjemadhësi dhe vetëkënaqësi. Është zgjedhja e tyre, por një sjellje e tillë sjell humbje të madhe të besimit”, tha Laporta.

Ai përfundoi duke thënë se Real Madridi, ndonëse në fund arrin marrëveshje me të gjithë, gjatë procesit pengon planet e të tjerëve. Laporta kërkoi që klubi të bëjë vetëkritikë, pasi e konsideron të papranueshme këtë sjellje.