Lamine Yamal mund të thyejë një rekord në finalen e Superkupës ndaj Real Madridit

Barcelona do të përballet me Real Madridin në Superkupën e Spanjës të dielën e 14 janarit, në atë që mund të jetë një tjetër natë historike për Lamine Yamal.

Blaugranasit e mposhtën Real Madridin me rezultat 3-1 në finalen e vitit të kaluar, teksa katalanasit siguruan trofeun e parë nën urdhrat e Xavit, para se eventualisht të fitojnë edhe titullin e La Liga-s.

Përkundër emocioneve të mëdha që po mbizotërojnë para këtij ballafaqimi në Riad, Barcelona pati një natë të vështirë kur e mposhti Osasunën në gjysmëfinale me rezultat 2-0, aty ku Yamal u fut nga banka dhe shënoi golin e dytë në kohën shtesë.

Xavi me shumë mundësi do t’i japë atij mundësinë që të luajë nga minuta e parë për shkak të lëndimit të Raphinhas, andaj spanjolli mund të thyejë një rekord në rast se shënon gol.

Yamal tashmë mbanë rekordin si golashënuesi më i ri në histori të Barcelonës, golashënuesi më i ri në histori të La Liga-s dhe në moshën vetëm 16 vjet e 182 ditë, ai u bë golashënuesi më i ri në Superkupën e Spanjës.

Në rast se ai shënon në finale, do ta zërë vendin e Ansu Fatit si golashënuesi më i ri në El Clasico, pasi ky i fundit e bëri vetëm në moshën 17 vjet e 359 ditë.

Sidoqoftë, që prej se u bë pjesë e ekipit të parë të Barcelonës, Yamal ka shkëlqyer me paraqitjet e tij dhe në rast se vazhdon kështu, mund të marrë ftesën e Spanjës për Euro 2024./Telegrafi/