Laçi triumfon ndaj Partizanit, Osmani: Epërsia numerike na dha vrull, mund të kishim shënuar më tepër

Laçi ka siguruar fitoren e radhës në kampionat, duke mposhtur Partizanin me rezultatin 0-2 në javën e dytë të “Abissnet Superiore”. Takimi u luajt në stadiumin “Arena Egnatia”, ndërsa në përfundim të tij, trajneri i kurbinasve, Qatip Osmani, dha deklaratën e tij për gazetarët.

“Kishim avantazhin minimal në pjesën e parë dhe luanim me një futbollist më shumë, por e vërteta është se nuk treguam qetësinë e duhur. Një skuadër që nuk është e përqendruar ndëshkohet dhe ne nuk duhet ta përsërisim këtë gabim”, analizoi fillimisht Osmani.

Tekniku vijoi më tej duke shpjeguar ndryshimet taktike: “Në 20 minutat e fundit e transformuam sistemin e lojës dhe kjo na dha një sinjal më cilësor. Edhe pse na mungojnë lojtarët e krahut, jemi të detyruar të aktivizohemi me dy sulmues. Duke parë rrjedhën e ndeshjes, pasi shënuam golin e parë dhe mbetëm me epërsi numerike, duhej të kishim më shumë këmbëngulje për të shënuar sërish”, shtoi Osmani.

“Planin e kishim të qartë që në stërvitje, donim ta orientonim lojën në këtë drejtim dhe të kërkonim golin e dytë sa më parë, në mënyrë që ta mbyllnim sfidën. Pas dy sulmuesve kemi lojtarë me teknikë dhe imagjinatë që mund të bëjnë diferencën në mesfushë. Edhe pse sot nuk arritëm të depërtojmë aq sa duhet dhe nuk krijuam një numër të madh rastesh, ne do të vazhdojmë të insistojmë në këtë filozofi loje”, përfundoi trajneri fitues.