Kur pritet ta bëjë zyrtare Barcelona transferimin e Joan Garcias?

Barcelona do të realizojë blerjen e parë të këtij afati kalimtar veror, duke transferuar portierin 24-vjeçar të Espanyolit, Joan Garcia, me marrëveshjen që është finalizuar efektivisht gjatë ditëve të fundit.

Kampionët e La Ligës tashmë kanë paguar klauzolën e lirimit prej 25 milionë eurosh të Garcias, ndërsa janë arritur edhe marrëveshjet personale me lojtarin.

Garcia ishte një nga portierët më të mirë në La Liga sezonin e kaluar dhe shpesh ka qenë faktor vendimtar në sigurimin e pikëve për Espanyolin, që shmangu rënien nga liga vetëm në momentet e fundit.

Kjo nuk ka kaluar pa u vënë re nga Barcelona, ndaj klubi katalanas ka bërë gjithçka për të mbyllur këtë transferim, pavarësisht problemeve të njohura financiare.

Arsenal, Newcastle United dhe Manchester United ishin gjithashtu të interesuar për Garcian, por lojtari dëshironte vetëm Barcelonën.

Për pasojë, marrëveshja u finalizua, edhe pse zyrtarisht nuk është bërë publike ende, megjithëse gjithçka është përfunduar.

Por kjo pritet të ndryshojë së shpejti, sipas të përditshmes Sport, Barcelona do të zyrtarizojë transferimin e Garcias të mërkurën.

Lojtari sapo është kthyer nga pushimet të martën, dhe kjo është arsyeja pse zyrtarizimi ka vonuar.

Megjithatë, ideja është që njoftimi zyrtar të bëhet brenda 24 orëve të ardhshme.