Kritikat ndaj Asllanit, trajneri i Interit i del në mbrojtje yllit të Kombëtares

Trajneri i Interit, Simone Inzaghi, mendon se futbollisti shqiptar Kristjan Asllani dhe Marko Arnautoviç nuk janë të vetmit futbollistë që duhen fajësuar për paraqitjen jo të mirë të zikaltërve në transfertën kundër Real Sociedad në sfidën e Ligës së Kampioneve.

Dy lojtarët e nisën për herë të parë si titullarë në këtë sezon, por Interi ishte larg performanës së zakonshme në fushë.

Në konferencë për shtyp pas takimit, Inzaghi tha:

“I kisha parashikuar vështirësitë ndaj një kundërshtari të denjë. Ishim mirë sepse për një orë vuajtëm por mbetëm në lojë dhe në fund, pasi barazuam, ne donim ta fitonim ndeshjen. Është gjithmonë e lehtë të flasësh pas ndeshjes. Kam ndryshuar katër lojtarë sepse ishim të lodhur, edhe për shkak të kombëtareve.”

I pyetur nëse priste më shumë nga Asllani dhe Arnautoviç, Inzaghi tha se: “Do të bëja sërish zgjedhjet e fillimit. Unë mendoj se nuk mund të ndalemi në disa elementë, i gjithë Interi duhet të kishte bërë më mirë, duke përfshirë edhe mua. Kemi nevojë për të gjithë. Në pjesën e parë vuajtëm të gjithë, jo vetëm ndryshimet që kisha bërë. Sommer na ndihmoi të qëndronim në lojë dhe më pas të kesh Lautaron përpara është gjithmonë ndihmë. Unë kam një skuadër të gjatë dhe cilësore që duhet të përpiqem ta shfrytëzoj, të gjithë që u futën bënë shumë mirë. Real Sociedad ishte një kundërshtar i shkëlqyer, bëri më mirë se ne. Në fund ndjenjat ishin pozitive”.

Rrugëtimi i Interit në Ligën e Kampioneve nisi me një barazim 1-1 në shtëpinë e Sociedadit.

Spanjollët kaluan në avantazh në minutën e 4-të falë Mendez. Tri minuta nga fundi i kohës së rregullt, Lautaro realizoi golin e barazimit, duke shkëputur ekipin nga humbja.