Kosova përballet sërish me Izraelin pas afro tre vjetësh, me katër pikë nga dy takimet e mëparshme

Të enjten, Kosova dhe Izraeli do të ndeshen në kuadër të Ligës së Kombeve B. Takimi i tretë i grupit do të luhet në Debrecen të Hungarisë, ku Izraeli i zhvillon ndeshjet si vendas. Për Dardanët, kjo shënon përballjen e parë me izraelitët pas gati tre vitesh.

Dy përfaqësueset janë ndeshur vetëm në dy raste, të dyja gjatë kualifikimeve për Kampionatin Evropian 2024. Kosova nuk pësoi humbje në këto duele, duke regjistruar një fitore dhe një barazim, për gjithsej katër pikë.

Takimi i parë u zhvillua më 25 mars 2023 në Tel Aviv, në hapje të fushatës kualifikuese të Kosovës. Në minutën e 36-të, goditja e Milot Rashicës përfundoi me autogolin e Eli Dasës dhe i kaloi Dardanët në epërsi. Dor Peretz barazoi për Izraelin në minutën e 56-të, ndërsa ndeshja përfundoi 1-1.

Më 12 nëntor 2023, Kosova e priti Izraelin në stadiumin “Fadil Vokrri” dhe triumfoi 1-0. Rashica realizoi golin e vetëm në pjesën e parë. Kjo ishte gjithashtu ndeshja e fundit e Kosovës në “Fadil Vokrri” përpara se stadiumi të hynte në rinovim.

Primoz Gliha ishte trajneri i Kosovës në atë periudhë.

Kualifikimet për Euro 2024 kishin nisur me pritshmëri të larta për Kosovën, e cila bënte pjesë në grup me Zvicrën, Rumaninë, Izraelin, Bjellorusinë dhe Andorrën. Por Dardanët e përfunduan garën në pozitën e pestë, me 11 pikë të grumbulluara nga dy fitore, pesë barazime dhe tri humbje. Ata shënuan 10 gola dhe pësuan po aq.

Katër pikët e marra ndaj Izraelit përbënin një prej rezultateve pozitive të Kosovës në atë fushatë. Tashmë ekipet takohen në një garë tjetër, në rrethana të reja dhe me objektiva të rëndësishëm në grupin e Ligës së Kombeve.

Pas dy ndeshjeve të para, Kosova numëron 3 pikë, kurse Izraeli nuk ka marrë ende asnjë pikë.

Përballja në Debrecen u jep Dardanëve mundësinë të ruajnë ecurinë pozitive ndaj Izraelit dhe të fitojnë pikë me peshë në këtë edicion.