Kombëtarja po kalon një evolucion”, Hysaj para sfidës me Finlandën: Të rinjtë kanë pak eksperiencë, ndërsa për të ardhmen jam në bisedime

Shqipëria do të luajë ndaj Finlandës në sfidën e vlefshme për raundin e tretë të Ligës së Kombeve. Në konferencën për shtyp të zhvilluar në stadiumin e Helsinkit, mbrojtësi Elseid Hysaj foli për përgatitjet e ekipit, lojtarët e rinj dhe të ardhmen e tij.

A po ua përcjell të rinjve një pjesë të përvojës suaj?

“Për të qenë i sinqertë, u kam dhënë një pjesë të përvojës sime. Gjithsesi, brezi ka ndryshuar. Të rinjtë janë disi më të brishtë, por kanë cilësi dhe nuk është se kanë shumë nevojë për ndihmën time.”

Cili është objektivi?

“Kemi një ekip shumë të fortë. Finlanda dhe Bjellorusia janë në të njëjtin nivel me ne. Ky ka qenë objektivi ynë që në fillim. Jemi një skuadër në evolucion dhe duhet të synojmë më shumë. Edhe trajneri i ri po na ndihmon në këtë drejtim.”

Si e shihni të ardhmen e Kombëtares?

“Mendoj se po shfaqen shumë lojtarë të rinj. Në mbrojtje na mungon ende një element. Qefalia dhe Hasa kanë një të ardhme përpara. Shqipëria do të jetë më e sigurt në repartin defensiv.”

Çfarë po ndodh me klubin?

“Kombëtarja më ka ndihmuar shumë. Deri tani kam qenë vetëm në stërvitje me Vllazninë, pasi kishin kaluar shumë muaj pa luajtur. Mund të hapet një mundësi e re, por aktualisht nuk ka asgjë zyrtare. Jam i përqendruar te kjo ndeshje.”

A e konsideroni kampionatin shqiptar si një alternativë?

“Me gjithë respektin, për mua do të ishte si një detyrë. Është një kampionat i mirë, por nuk është momenti i duhur.”