“Kokë më kokë” për mbijetesën, Kukësi tenton të “shkelmojë” krizën ndaj Teutës

Teuta – Kukësi do të jetë një nga sfidat më të luftuara në javën e 24-të. Një duel direkt për mbijetesën në Superiore, teksa të dyja ekipet ndajnë mes tyre vendet e fundit në klasifikim.

Verilindorët po kalojnë një moment të vështirë në kampionat, teksa në 13 ndeshje nuk ia kanë dalë dot të shkojnë të fitorja. Këto rezultate kanë bërë që skuadra e Kukësit të renditet në vendin e fundit me 19 pikë pas 23 sfidash.

Emiliano Çela prej dy ndeshjes drejton Kukësin dhe nuk ka mundur dot të marrë pikë, teksa ndaj Teutës, sfidë që do të luhet ditën e premte në orën 16:00 në “Niko Dovana” është i detyruar vetëm për rezultat pozitiv. Kjo është ndeshje direkte që do t’i jepte mundësinë verilindorëve të kalojnë në renditje një rival dhe të luftojnë për t’iu larguar zonës së ftohtë të klasifikimit.

Kuksianët në këtë sezon kanë mbrojtjen më të keqe, pasi kanë pësuar plot 37 gola, ndërsa ia kanë dalë të gjejnë rrugën e rrjetës në 23 raste. /newsport.al/