Juventusi synon huazimin e Noni Maduekes në janar, Arsenali gati ta lërë të lirë

Noni Madueke po kalon një periudhë të vështirë te Arsenali dhe Juventusi po e ndjek nga afër situatën e tij, me idenë për ta marrë në formë huazimi në merkaton e dimrit.

Sipas raportimeve të CaughtOffside, sulmuesi anësor anglez nuk po gjen hapësira në menaxhimin e Mikel Artetës. Ai ka luajtur vetëm në katër nga gjashtë takimet e Arsenalit këtë sezon, duke regjistruar gjithsej 100 minuta në fushë. Në derbin ndaj Chelseat, pjesëmarrja e tij ishte simbolike, vetëm një minutë lojë.

Arsenali e ka të lidhur lojtarin me kontratë deri më 30 qershor 2030, por nuk dëshiron që çmimi i tij në treg të pësojë rënie. Për këtë arsye, klubi londinez po mendon ta dërgojë atë në huazim në janar te një ekip që mund t’i ofrojë minuta të qëndrueshme në një nivel të lartë, përfshirë edhe kompeticionet evropiane.

Për Juventusin, kjo lëvizje paraqitet tërheqëse si nga ana teknike, ashtu edhe nga ajo financiare. Skuadra e Luciano Spallettit ka çështje për të zgjidhur gjatë dimrit, por në mungesë të shitjeve të mëdha, bardhezinjtë do të duhet të orientohen drejt huazimeve dhe jo drejt transferimeve të kushtueshme.

Madueke luan në krahun e sulmit, një pozicion ku Juventusi ka aktualisht disa zgjidhje, ndër to Francisco Conceicao dhe Edon Zhegrova. Megjithatë, skenari mund të ndryshojë nëse Nico Gonzalez zhvendoset si sulmues i rremë dhe nëse Zhegrova, pas dopietës së fundit ndaj Sassuolos, largohet nga Torino.

Interesimi për lojtarin anglez nuk vjen vetëm nga Italia. Edhe Atletico Madridi po shqyrton mundësinë e një huazimi, sidomos nëse Arsenali pranon të shtojë një opsion blerjeje me një çmim më të ulët sesa vlerësimet e zakonshme të Premier Ligës.