Juventusi konfirmon Igor Tudor në stol edhe për sezonin 2025/2026

Drejtori i ri i Përgjithshëm i Juventusit, Damien Comolli, ka konfirmuar se Igor Tudor do të mbetet në krye të skuadrës edhe pas përfundimit të Kupës së Botës për Klube.

Comolli, i cili u prezantua zyrtarisht të martën në një konferencë për shtyp në ‘Allianz Stadium’, foli për herë të parë për mediat italiane dhe një nga temat kryesore ishte pikërisht e ardhmja e trajnerit kroat.

Tudor u emërua trajner në mars, duke zëvendësuar Thiago Mottan, dhe kontrata e tij u zgjat automatikisht deri në vitin 2026 pasi siguroi kualifikimin në Ligën e Kampionëve.

Megjithatë, Juventus ka një opsion për të ndërprerë kontratën e trajnerit me pagesën e vetëm 1 milion eurove deri më 31 korrik 2025.

Klubi gjithashtu kishte zhvilluar më parë bisedime me Antonio Conten dhe Gian Piero Gasperinin.

Por Comolli e bëri të qartë se Tudor do të vazhdojë të jetë trajner i Juventusit për sezonin e ardhshëm.

“Unë mund të konfirmoj se Tudor do të jetë trajner edhe për sezonin e ardhshëm, përtej Kupës së Botës për Klube”, tha Comolli për Ilbianconero.com.

Comolli ka mbajtur disa role të rëndësishme në futboll, përfshirë ato të skautit kryesor dhe presidentit.

Ai ishte më parë president i Toulouse dhe ka pasur përballje direkte me Tudorin gjatë kohës që ky i fundit drejtonte Marseille në Ligue 1.