Juventus në alarm, Kenan Yildiz rrezikon të mungojë deri në dy muaj

Fitorja në debutimin e sezonit të ri në Serie A është shoqëruar me një lajm negativ për Juventusin, pasi Kenan Yildiz ka pësuar një dëmtim në këmbë.

Sipas La Gazzetta dello Sport dhe raportimeve të tjera të mediave italiane, sulmuesi turk iu nënshtrua të hënën ekzaminimeve mjekësore në qendrën stërvitore të klubit në Torino. Përgjigjet e kontrolleve nuk kanë qenë inkurajuese dhe Yildiz mund të qëndrojë jashtë fushës për rreth dy muaj.

Gjithashtu, mediat në Itali bëjnë të ditur se si mundësi mbetet edhe ndërhyrja kirurgjikale për trajtimin e dëmtimit në këmbën e tij.

Problemi i tanishëm nuk lidhet me shqetësimet e përsëritura në gju, nga të cilat Yildiz vuajti në fundin e sezonit të kaluar.

Yildiz ishte grumbulluar nga trajneri Luciano Spalletti për sfidën e parë të Juventusit në Serie A. Në atë takim, “Zonja e Vjetër” triumfoi 1-0 në transfertë ndaj Frosinones, skuadrës së sapo promovuar.

Ky dëmtim e vendos Juventusin përballë rrezikut që të luajë javët e para të sezonit pa një prej futbollistëve më të rëndësishëm të ekipit.

Megjithatë, klubi nga Torino nuk pritet të kërkojë një zëvendësues të drejtpërdrejtë në afatin kalimtar. Luciano Spalletti mund të mbështetet te Jeremie Boga dhe afrimi i ri Kerim Alajbegovic, ndërsa në skuadër është edhe Nico Gonzalez, i cili sezonin e kaluar luajti si i huazuar te Atlético Madrid.