Julian Alvarez refuzon ofertën e Arsenalit pas bisedës me Artetën

Arsenali ka marrë një goditje të rëndë në përpjekjen për të transferuar Julian Alvarezin, pasi sulmuesi i Atletico Madridit raportohet se i ka bërë të ditur Mikel Artetës se nuk dëshiron të kalojë te klubi londinez.

Gazetari David Ornstein konfirmoi këtë zhvillim, duke deklaruar: “Ai ka folur me Mikel Arteta-n dhe i ka thënë se nuk dëshiron të vijë”.

Vendimi i futbollistit argjentinas rrezikon t’i mbyllë përfundimisht mundësitë e Arsenalit për ta afruar atë, edhe pse klubi ishte i gatshëm të investonte ndjeshëm për përforcimin e repartit ofensiv.

Alvarez ishte zgjedhur si objektivi kryesor i Arsenalit për sulmin e drejtuar nga Arteta. Për ta siguruar shërbimin e 26-vjeçarit, londinezët ishin të përgatitur të shqyrtonin një marrëveshje që mund të kalonte vlerën e 120 milionë eurove.

Atletico Madridi, nga ana tjetër, kohët e fundit kishte shfaqur më shumë gatishmëri për ta shitur lojtarin, veçanërisht për shkak të tensioneve që lidhen me situatën e tij.

Pavarësisht kësaj, qëndrimi i Alvarezit mbetet pengesa kryesore. Barcelona kishte qenë më herët destinacioni i preferuar i tij, por Atletico Madridi ka sqaruar se nuk do të pranojë një marrëveshje me rivalët e tij spanjollë.