Categories: sport

Jose Mourinho nuk e preferon, Manchester United bëhet gati të ofrojë mbi 80 milionë euro për yllin e Real Madridit

Aurelien Tchouameni është kthyer në një prej objektivave kryesorë të Manchester United për merkaton e verës, ndërsa klubi anglez ka shtuar përpjekjet për të siguruar shërbimet e mesfushorit francez.

Të lidhura

None found

Raportimet bëjnë të ditur se “Djajtë e Kuq” janë të gatshëm të shpenzojnë më shumë se 80 milionë euro, me synimin për ta bindur Real Madridin që të miratojë largimin e 26-vjeçarit.

Përforcimi i mesfushës, në veçanti i rolit mbrojtës në këtë repart, është një nga synimet e United. Tchouameni vlerësohet si zgjedhja ideale për shkak të eksperiencës së fituar në La Liga, në Ligën e Kampionëve dhe me Kombëtaren e Francës.

Nevoja e Manchester United për një mesfushor mbrojtës është bërë urgjente, sidomos pas largimit të Casemiros dhe problemeve me lëndimet në këtë repart.

Megjithëse interesimi ka hyrë në një fazë më të avancuar, mes klubeve nuk është arritur ende marrëveshje dhe nuk është paraqitur asnjë ofertë zyrtare. Diskutimet pritet të vijojnë gjatë ditëve të ardhshme, kur do të shihet nëse operacioni mund të realizohet.

Real Madridi nuk është i detyruar ta nxjerrë francezin në shitje, pasi kontrata e tij mbetet e vlefshme deri në verën e vitit 2028. Klubi nga Madridi mund ta hedhë poshtë ofertën, të kërkojë më shumë para ose ta pranojë atë nëse vlerëson se të ardhurat do të financonin ndryshime të tjera brenda skuadrës.

Tchouameni kaloi nga Monaco te Real Madridi në vitin 2022. Për transferimin e tij u paguan 80 milionë euro, ndërsa marrëveshja përfshinte edhe 20 milionë euro të tjera në bonuse.

Prej mbërritjes në “Santiago Bernabeu”, francezi është aktivizuar në mesfushë dhe, kur skuadra ka pasur nevojë, edhe në qendër të mbrojtjes. Gjatë sezonit të kaluar ai regjistroi 49 paraqitje në të gjitha kompeticionet, realizoi dy gola dhe kaloi 3 mijë e 940 minuta në fushë.

Javët që vijnë pritet të përcaktojnë të ardhmen e mesfushorit francez, ndërsa lëvizja e mundshme mund të bëhet një nga transferimet më të mëdha të kësaj vere.