Jose Fonte për duelin Messi-Ronaldo: Argjentinasi ka dhunti hyjnore, por arritjet e Cristiano Ronaldos mbeten të pakrahasueshme

Jose Fonte, ish-mbrojtësi i Kombëtares së Portugalisë, ka dhënë qëndrimin e tij lidhur me rivalitetin legjendar mes Lionel Messit dhe Cristiano Ronaldos.

Për gati dy dekada, pyetja se kush është më i mirë mes Messit dhe Ronaldos ka dominuar diskutimet në futboll.

Lojtarë, trajnerë dhe tifozë anembanë botës janë ndarë në opinione, duke mbrojtur secili zgjedhjen e vet në këtë debat të madh.

Sipas Fontes, edhe pse Messi zotëron një talent të jashtëzakonshëm, madhështia e Cristiano Ronaldos është diçka që nuk mund të përsëritet.

“Nuk ka asnjë dyshim se Messi u prek nga Zoti. Nuk kemi parë kurrë askënd të bëjë gjërat që bën ai”, u shpreh fillimisht Fonte.

“Por madhështia e Cristianos nuk mund të mohohet, sepse ajo që ai ka arritur në botën e futbollit është e pabesueshme dhe ndoshta nuk do të përsëritet kurrë. U rrita me të; pashë sa shumë duhej të punonte për të arritur gjithçka që bënte”.

Portugezi theksoi gjithashtu se, pavarësisht mbështetjes së tij për Ronaldon, ai e vlerëson plotësisht edhe atë që ka realizuar Messi.

“Gjithmonë do të jem një tifoz i Ronaldos, por mund ta vlerësoj plotësisht atë që Messi ka bërë… Kam luajtur kundër tij. Jemi thjesht me fat që jemi dëshmitarë dhe jetojmë në të njëjtën epokë me këta djem”, përfundoi portugezi.