Jasmin Celikovic ndahet nga Vllaznia pas ndeshjes me Skënderbeun

Jasmin Celikovic nuk do të jetë më pjesë e Vllaznisë. Mbrojtësi boshnjak 27-vjeçar bëri të ditur largimin nga skuadra shkodrane, edhe pse u aktivizua në përballjen ndaj Skënderbeut, në javën e parë të sezonit të ri të Superiores.

Lajmin për ndarjen nga “kuqeblutë”, Celikovic e komunikoi përmes një postimi në rrjetet sociale. Ai iu bashkua Vllaznisë në gusht të vitit 2025.

POSTIMI:

Pas gjithë rrugëtimit që kemi përshkuar bashkë, ka ardhur koha për t’u përshëndetur. Të largohesh nga një klub dhe një qytet që janë bërë pjesë e jetës tënde nuk është aspak e lehtë.

Që në ditën e parë kam treguar sinqeritet ndaj këtij klubi. Çdo herë që kam veshur fanellën e Vllaznisë, e kam bërë me krenari. Në çdo seancë stërvitore dhe në çdo ndeshje kam dhënë gjithçka, pavarësisht situatave të krijuara. Kam luftuar për stemën, klubin dhe qytetin.

E njoh mirë përkushtimin që kam dhënë dhe ndaj largohem me kokën lart e me ndërgjegje të qetë. Ndoshta nuk kam pasur mundësi të ndikoj në çdo zhvillim, por kam kontrolluar gjithmonë mënyrën se si jam sjellë ndaj klubit. Me Vllazninë kam qenë i drejtë, profesionist dhe besnik.

Pas meje mbetet një pjesë e zemrës, ndërsa me vete marr kujtime që nuk mund të m’i fshijë askush. Mirënjohje për shokët e skuadrës, trajnerët, punonjësit e klubit dhe të gjithë ata që ishin pjesë e këtij udhëtimi.

Edhe ju, tifozë, faleminderit që ma bëtë ta ndieja edhe më fort rëndësinë e kësaj stemë. Ju falënderoj për çdo duartrokitje, këngë, kritikë dhe për çdo çast kur qëndruat pranë nesh.

Ndoshta tani është momenti të nis një kapitull tjetër, por ndjenjat e mia për këtë klub do të jenë gjithmonë pjesë e imja. Një herë Vllaznia, gjithmonë Vllaznia.