Izraeli pritet të ndryshojë pesë lojtarë ndaj Kosovës, Shimon përgatit formacion të ri

Kombëtarja e Izraelit pritet të paraqitet me një formacion të ndryshuar në përballjen me Kosovën, pasi përzgjedhësi Ran Ben Shimon synon të reagojë pas dy humbjeve të para në Ligën e Kombeve.

Sipas mediumit izraelit “Sport5”, tekniku pritet të bëjë pesë ndryshime në 11-shen që e nisi humbjen 3-0 ndaj Irlandës. Izraeli do të luajë të enjten kundër Kosovës në “Nagyerdei Stadion” të Debrecenit, me objektivin për të siguruar pikët e para në këtë edicion.

Ndërhyrja kryesore pritet të ndodhë në portë. Daniel Peretz parashikohet të pushojë për shkak të rotacionit, ndërsa në vendin e tij pritet të aktivizohet Omri Glazer.

Në stol mund të përfundojnë edhe katër futbollistë të rëndësishëm: Oscar Gloukh, Roy Revivo, Gabi Kanikowski dhe Dor Turgeman. Ndërkohë, Revivo nuk e ka përfunduar stërvitjen e së mërkurës.

Pas disfatës së thellë ndaj Irlandës, Ben Shimon kishte paralajmëruar ndryshime të forta. Raportimet e ditëve të fundit bëjnë me dije se përzgjedhësi kërkon një ekip më agresiv dhe më të qëndrueshëm në mbrojtje, pasi paraqitjet e fundit janë vlerësuar si më të dobëta se pritshmëritë.

“Sport5” ka publikuar edhe formacionin e mundshëm të Izraelit. Në portë pritet të jetë Omri Glazer; në repartin defensiv Anan Halaili, Raz Shlomo, Nikita Stoyanov, Idan Nahmias dhe Liel Abada; në mesfushë Eliel Peretz, Dor Peretz dhe Eitan Azoulay, ndërsa në vijën e sulmit Manor Solomon dhe Tai Baribo.

Ky formacion do të përbënte një ndryshim të madh krahasuar me 11-shen që luajti nga minuta e parë në humbjen 3-0 ndaj Irlandës, ku ishin titullarë Gloukh, Kanikowski, Revivo dhe Turgeman.

Izraeli vjen në këtë ndeshje pas dy humbjeve në Ligën e Kombeve: 3-1 ndaj Austrisë dhe 3-0 kundër Irlandës. Për këtë arsye, takimi me Kosovën shihet si mundësia e parë për të reaguar dhe për të regjistruar pikët e para në këtë fushatë.

Formacioni i mundshëm i Izraelit: Omri Glazer; Anan Halaili, Raz Shlomo, Nikita Stoyanov, Idan Nahmias, Liel Abada; Eliel Peretz, Dor Peretz, Eitan Azoulay; Manor Solomon, Tai Baribo.