Ish-transferimi i Kloppit drejt largimit nga Liverpooli, Iraola jep miratimin për Endon

Wataru Endo mund të largohet nga Liverpooli gjatë afatit kalimtar të janarit, pasi Andoni Iraola raportohet se është i gatshëm ta miratojë transferimin e mesfushorit japonez. Lojtari iu bashkua klubit anglez tri vjet më parë, në kohën kur skuadra drejtohej nga Jürgen Klopp.

Gjatë verës, Liverpooli dhe Iraola kryen ndryshime të rëndësishme në përbërjen e ekipit. Mohamed Salah, Andreë Robertson dhe Ibrahima Konate u larguan pas përfundimit të kontratave, ndërsa Curtis Jones, Stefan Bajcetic dhe Luca Stephenson u transferuan përfundimisht në klube të tjera.

Ndërkohë, në “Anfield” mbërritën disa përforcime, përfshirë Bradley Barcolan, Jeremy Jacquet, Victor Muñoz, Lucca Brughmans, Ifeanyi Ndukwe dhe Ronald Araujon, i cili u bashkua në formë huazimi.

Edhe pse Iraola ka vetëm gjashtë ndeshje në krye të Liverpoolit, raportimet bëjnë të ditur se trajneri bask nuk do ta pengonte largimin e një futbollisti të ekipit të parë në merkaton e janarit.

Mesfushori 33-vjeçar Wataru Endo është emri që lidhet me këtë lëvizje. Ai nuk u përfshi në listën prej 25 lojtarësh të Liverpoolit për Ligën e Kampionëve dhe këtë sezon ende nuk ka regjistruar asnjë minutë në Premier League.

Endo u transferua te Liverpooli në vitin 2023 nga skuadra gjermane Stuttgart, për një shumë prej rreth 19 milionë eurosh.

Në sezonin e parë në “Anfield”, japonezi luajti 43 ndeshje në të gjitha garat dhe shënoi dy gola. Në atë periudhë, ai ishte një nga futbollistët e rëndësishëm të formacionit të drejtuar nga Klopp.

Gjatë sezonit të parë të Arne Slotit në stolin e Liverpoolit, Endo u aktivizua në 32 takime. Në atë edicion, “Të Kuqtë” u shpallën kampionë të Ligës Premier.

Megjithatë, fushata 2025/26 rezultoi shumë më problematike për mesfushorin. Për shkak të lëndimeve, ai u paraqit vetëm në tetë ndeshje të kampionatit dhe në 12 sfida në të gjitha garat.