Interi zyrtarizon transferimin e Djed Spence

Interi ka konfirmuar zyrtarisht afrimin e Djed Spence nga Tottenham Hotspur, në një operacion që arrin vlerën e 35 milionë eurove së bashku me bonuset.

Mbrojtësi anglez ka firmosur me “Nerazzurrët” një marrëveshje të vlefshme deri në qershor të vitit 2031. Ai është futbollisti i dytë nga Anglia që transferohet tek Interi gjatë kësaj vere, pas John Stones, i cili iu bashkua klubit si lojtar i lirë nga Manchester City.

Spence zbarkoi në Milano në orët e vona të së enjtes. Gjatë së premtes, ai kreu kontrollet e plota mjekësore, fillimisht pranë klubit dhe më pas te CONI, Komiteti Olimpik Italian.

Pasi testet përfunduan pa asnjë problem, lojtari hodhi firmën në kontratën e tij të re. Sipas marrëveshjes, ai besohet se do të përfitojë rreth 2.5 milionë euro për sezon, përveç bonuseve që lidhen me paraqitjet dhe performancën.

Nga ky transferim, Tottenham do të arkëtojë menjëherë rreth 31.5 milionë euro, ndërsa 3.5 milionë euro të tjera mund të sigurohen përmes bonuseve. Klubi londinez ka përfshirë gjithashtu në marrëveshje të drejtën për të marrë 10 për qind të shumës nga një shitje e ardhshme e futbollistit.

Për Spence, kalimi tek Interi përfaqëson një rikthim në Serie A. Ai ka luajtur më herët në Itali me Genoan, ku kaloi gjashtë muaj si i huazuar gjatë vitit 2024.

26-vjeçari, i cili festoi ditëlindjen vetëm javën e kaluar, është në gjendje të aktivizohet në të dy krahët e mbrojtjes, si në të djathtin, ashtu edhe në të majtin.

Interi e konsideron Spence si zëvendësuesin ideal të Denzel Dumfriesit në krahun e djathtë, pasi mbrojtësi holandez u transferua te Real Madridi.