Interi e nis sezonin 2026/27 me fitore të thellë ndaj Monzës

Interi ka regjistruar një start pozitiv në sezonin 2026/27 të Serie A, duke mposhtur Monzën me rezultatin 4-1 në ndeshjen e javës së parë të kampionatit italian.

Skuadra zikaltër kaloi përpara që në minutën e gjashtë. Hakan Calhanoglu pranoi topin e dhuruar nga Andy Diouf dhe, pas një kontrolli të saktë, goditi fuqishëm nga jashtë zonës për të kaluar Interin në avantazh.

Monza nuk vonoi të përgjigjej dhe në minutën e 29-të vendosi baraspeshën. Mathis Mout gjeti Gustavo Varelan brenda zonës, ndërsa ky i fundit e mposhti portierin kundërshtar dhe shënoi për 1-1.

Me këtë rezultat u mbyll edhe pjesa e parë, por pas pushimit Interi mori menjëherë kontrollin e takimit.

Në minutën e tetë, Semuel Pizzignacco gaboi në goditjen e topit dhe ia dhuroi atë Piotr Zielinskit. Mesfushori polak përfitoi nga rasti dhe, me një goditje nga distanca, riktheu Interin në epërsi për 2-1.

Vetëm gjashtë minuta më pas, “Nerazzurrët” shënuan sërish. Andy Diouf asistoi për Francesco Pio Espositon, i cili e përfundoi aksionin me një goditje të bukur me thembër, duke e çuar rezultatin në 3-1.

Interi vijoi të ushtronte presion dhe në minutën e 63-të realizoi edhe golin e katërt. Yann Bisseck mori topin në hyrje të zonës dhe goditi fort, ndërsa devijimi e dërgoi topin në rrjetën e Pizzignaccos për 4-1.

Monza u përpoq të rikthehej në ndeshje dhe në minutën e 76-të pati një rast të mirë, kur Samuele Birindelli synoi këndin e poshtëm. Megjithatë, Josep Martinez reagoi në kohë dhe ndali goditjen.