Infantino mund të fitonte mbi 30 milionë euro në vit nga plani për të drejtat e Kupës së Botës

Gianni Infantino mund të siguronte më shumë se 30 milionë euro në vit, krahas bonuseve të tjera, nëse propozimi i presidentit të FIFA-s për riorganizimin e të drejtave komerciale të Kupës së Botës do të merrte miratimin.

Gazeta britanike The Times ka përllogaritur se të ardhurat e tij do të vareshin drejtpërdrejt nga projekti që synonte shitjen e një pjese të të drejtave të kompeticionit më të madh të futbollit.

Plani i refuzuar mbante emrin FIFA Forward Enterprise dhe parashikonte nxjerrjen në shitje të 20 për qind të të drejtave komerciale të Kupës së Botës. Përmes marrëveshjes, FIFA synonte të përfitonte rreth 3.65 miliardë euro nga investitorët privatë.

Propozimi hasi kundërshtim të fortë nga UEFA, CONCACAF dhe një numër i madh federatash kombëtare. Pas reagimeve të ashpra, projekti përfundimisht u rrëzua.

Infantino ka këmbëngulur vazhdimisht se nuk synonte të nxirrte përfitime personale nga kjo nismë.

Dokumentet e publikuara nga The Times, megjithatë, ngrenë pikëpyetje mbi deklaratat e tij. Sipas tyre, presidenti i FIFA-s mund të merrte një pagë vjetore prej mbi 30 milionë eurosh, afërsisht dhjetëfishin e pagës së tij aktuale, e cila vlerësohet në rreth tre milionë euro.

Në bazë të dokumenteve të siguruara nga The Times, Infantino u kishte propozuar të gjitha 211 federatave anëtare të FIFA-s që secila të mund të përfitonte deri në 35 milionë euro, me kusht që të mbështeste krijimin e FIFA Forward Enterprise.

Struktura e re tregtare do të merrte përsipër administrimin e garave kryesore të FIFA-s, ndërsa investitorëve privatë do t’u jepej mundësia të blinin pjesë pronësie në këto kompeticione.

Për shqyrtimin dhe pranimin e propozimit, federatat do të kishin në dispozicion rreth 50 ditë. Infantino argumentonte se miratimi i projektit do të vinte në funksion, duke nisur nga 1 janari 2027, një paketë financiare me vlerë 8.7 miliardë euro.

Nëse propozimi nuk do të pranohej, do të mbetej në fuqi programi ekzistues FIFA Forward, i planifikuar më herët me një vlerë prej 2.7 miliardë dollarësh, ose rreth 2.4 miliardë euro.

Në letrën dërguar federatave, Infantino shkruante se zgjedhja për të vijuar ose jo me propozimin u takonte tërësisht atyre. Ai theksonte se, në rast miratimi, paketa prej 8.7 miliardë eurosh do të vihej në dispozicion më 1 janar 2027, duke hapur fazën e ardhshme të rrugëtimit të përbashkët.

Presidenti i FIFA-s shtonte se, nëse federatat do të preferonin ruajtjen e status quo-së dhe rrëzimin e projektit, do të zbatohej zgjatja e parashikuar e programit FIFA Forward, me vlerë 2.4 miliardë euro. Sipas këtij modeli, çdo shoqatë kombëtare do të mund të merrte deri në 35 milionë euro gjatë ciklit që fillon në vitin 2027.