Ibrahimovic vlerëson Japoninë pas humbjes dramatike ndaj Brazilit: Meritonin më tepër

Brazili arriti të sigurojë kalimin në 1/8 e finales të Kupës së Botës, pasi mposhti Japoninë me rezultatin 2:1 në një duel dramatik, të vendosur nga goli i fitores në minutat shtesë.

Skuadra japoneze ishte shumë afër të shkaktonte një surprizë të madhe dhe ta çonte ndeshjen në vazhdime, por në çastet e fundit Gabriel Martinelli realizoi golin që i dha “Seleçaos” një kualifikim të vuajtur.

Pas përfundimit të takimit, reagoi edhe Zlatan Ibrahimovic, i cili nuk e fshehu vlerësimin për paraqitjen e Japonisë.

“Ndjej një trishtim të madh për trajnerin Moriyasun dhe lojtarët e tij, ata meritonin më shumë. Ishin vetëm një minutë larg kohës shtesë kur Martinelli shënoi”, deklaroi Ibrahimovic.

Legjenda suedeze nënvizoi se rrjedha e ndeshjes ndryshoi pas golit të Casemiros.

“Goli i Casemiros ndryshoi intensitetin e lojës në favor të Brazilit. Ata e gjetën përsëri ritmin e tyre. Gabriel Magalhaes, Marquinhos, Danilo dhe të tjerët ua rikthyen vetëbesimin, ndërsa Vinicius, Matheus Cunha dhe pastaj Martinelli e ngritën nivelin e lojës”, analizoi ai.

Ibrahimovic pati vlerësime të mëdha edhe për repartin mbrojtës të Japonisë.

“Ito, Taniguchi dhe Tomiyasu luftuan si luftëtarë”, tha ai, duke shtuar se Ancelotti kishte vënë re lodhjen e disa prej futbollistëve më të rëndësishëm të Japonisë.

“Ancelotti e pa se Kamada, Nakamura, Sano dhe Doan ishin të rraskapitur dhe nuk mund ta ndihmonin më mbrojtjen”.

Në fund, Ibrahimovic përgëzoi edhe këmbënguljen e brazilianëve deri në mbyllje të ndeshjes.

“Endrick, Martinelli dhe Fabinho hynë në fushë. Brazili bëri presion deri në sekondat e fundit dhe në fund u shpërblye”.

Falë këtij suksesi, Brazili vijon aventurën në Kupën e Botës dhe në 1/8 e finales do të ndeshet me fituesin e përballjes mes Bregut të Fildishtë dhe Norvegjisë, ndërsa Japonia e mbyll një tjetër paraqitje mbresëlënëse në arenën botërore.