Humbje që kushton titull kampioni, Bayern Munich mposhtet kësaj radhe nga Bochum

Bochum ka arritur ta mposht Bayern Munichun me rezultat 3-2 në kuadër të javës 22-të në Bundesliga, duke i lënë bavarezët shumë prapa në luftë për titull.

Ndeshja nisi furishëm nga të dyja palë që donin të shënonin sa më parë dhe kishin rastet e tyre.

Pas disa tentativave, në minutën e 14-të, erdhi edhe goli i parë, kur Jamal Musiala shënoi për 1-0.

Pas golit ndeshja u ndërpre për më shumë dhe dhjetë minuta, shkaku i protestave të tifozëve dhe siç duket kjo ndikoi keq në formën e bavarezëve të cilët me tu kthyer në fushë pësuan gola.

Takuma Asano mori një pasim të bukur nga Anthony Losilla për ta kthyer në gol për 1-1.

Pak pa u mbyllur pjesa e parë, Keven Schlotterbeck u gjend bukur në zonë për të shënuar për epërsinë e Bochum për 2-1.

Edhe në pjesën e dytë ndeshja u ndërpre për disa minuta shkaku i protestave nga tifozët gjermanët.

Në minutën e 77-të, Dayot Upamecano rrëzoi një lojtar vendas në zonë dhe pastaj mori kartonin e dytë të verdhë për tu larguar nga fusha.

Nga pika e bardhë Kevin Stoger arriti ta mposht Manuel Neuerin për 3-1.

Bavarezët arritën të hapnin ndeshjen në minutën e 87-të, kur Mathys Tel asistoi te Harry Kane që shënoi për 3-2.

Në kohën shtesë prej tetë minutash nuk është se munguan rastet nga të dyja palët, po që rrjetat heshtën.

Bayern Munich me këtë humbje mbetet në vendin e dytë me 50 pikë, tetë më pak se sa Bayer Leverkusen që është lider. /Telegrafi/